Instituti Kosovar për Studime të Lindjes së Mesme – KIMES, dje në Prishtinë organizoi tryezën me temën: Prezenca e Tregut Kosovar në Lindjen e Mesme.
Në kohën kur në vendin tonë çdo ditë e më shumë po shtohen prodhuesit e produkteve të ndryshme, në të njëjtën kohë po shtohet edhe vështirësia e eksporteve të këtyre produkteve në vende e tjera të botës. Njëra nga shkaqet kryesore del të jetë edhe statusi i shtetit të ri, i cili ende nuk e ka siguruar ulësen e vet në OKB, dhe si rezultat edhe nuk është anëtare në shumë organizata ekonomike ndërkombëtare. Në këtë drejtim, pas një hulumtimi të realizuar nga instituti KIMES në Prishtinë, del se Kosova është shumë pak prezente në tregun e Lindjes së Mesme.
Panelistët në këtë tryezë, profesori i ekonomisë, deputeti Dr. Muhamet Mustafa, njëherit kryetar i komisionit parlamentar për Zhvillim Ekonomik, Tregti dhe Industri; Vllaznim Osmani, sekretar i Klubit të Prodhuesve të Kosovës, si dhe drejtori i institutit KIMES, Amir Ahmeti, nënvizuan mundësitë e eksportit të prodhimeve të Kosovës në këtë pjesë të botës. Ku siç thanë ata, është terren me mundësi të shumta për eksporte, e sidomos në vendet e Gjirit.
Amir Ahmeti, në emër të institutit KIMES, para shumë musafirëve nga kompani e institutcione të ndryshme të vendit, shpalosi analizën dhe hulumtimin e realizuar nga instituti, për prezencën e tregut kosovar në Lindjen e Mesme. Ky hulumtim pasqyron se Kosova shumë zbehtë është e shtrirë në këtë pjesë të botë, dhe për të parë më saktë prezencën tonë në tregun e Lindjes së Mesme, KIMES ka paraqitur statistika me diagrame të eksporteve të realizuara. E për të qenë më e kuptueshme prezenca e zbehtë e produkteve të Kosovës në këtë pjesë të botës, KIMES i ka krahasuar ato me vendet e tjera të rajonit të Ballkanit, si Shqipërisë, Maqedonisë, Bosnjes, Malit të Zi dhe Serbisë. Si përfundim, Kosova duket se është e fundit me eksporte nga vendet e rajonit, gati në të gjitha vendet e Lindjes së Mesme.
Ndërsa Kosova ka eksportuar në Emiratet e Bashkuara Arabe (EBA) gjatë vitit 2015 mallra në vlerë rreth 300 mijë dollarë, vendet e tjera të rajonit kanë eksportuar në këtë vend mallra në vlerë prej miliona dollarësh. P. sh.: Mali i zi rreth 900 mijë dollar; Maqedonia mbi tre milion; Shqipëria mbi 4.5 milion; Bosnja mbi 16 milion dhe Serbia rreth 40 milion dollarë. Vetëm në Kuvajt dhe Katar Kosova nuk është e fundit me eksporte në krahasim me vendet e tjera të rajonit. /tesheshi.com/
