Zonja e Parë aktuale amerikane, Melania Trump është kritikuar për gjithçka – nga fjalët e thëna te veshja. Ndonjëherë duket se ajo nuk është fare e tërhequr nga jeta në Shtëpinë e Bardhë.
Por sllovenia 50-vjeçare, Zonja e Parë, mund të zgjasë qëndrimin e saj në krahun lindor të Shtëpisë së Bardhë dhe për katër vjet të tjera.
Melania Trump, gruaja e tretë e Donald, është një ish-modele dhe një burim diskret i mbështetjes për udhëheqësin amerikan, kryesisht pas kamerave.
Në një libër të botuar vitin e kaluar, Kate Bennet i CNN shkruajti se Zonja e Parë është “shumë më e fuqishme dhe ka më shumë ndikim mbi burrin e saj” sesa di publiku. Melania bëri thirrje hapur për dorëheqjen e këshilltarit të lartë të presidentit në 2018.
Melania është kryesisht një enigmë, të paktën në aspektin politik. Por kur ajo me qëllim vendosi veten në qendër të vëmendjes, filluan kritikat.
Lindur në Slloveni
Fushata e saj kundër abuzimit “Be the Best” nuk u prit mirë, me shumë njerëz që treguan me gisht cicërimat jo civilizuese të burrit të saj. Zgjedhjet e saj të modës gjithashtu nxitën një mori komentesh.
“Zonjat e para përballen me sfidën e madhe për të bërë një punë pa një përshkrim konkret të saj dhe me kritika pothuajse të vazhdueshme publike,” tha për AFP Kate Andersen Brower, autore e “First Women: The Grace & Power of Modern First Ladies of America”.
“Ata kurrë nuk mund t’i kënaqin të gjithë në të njëjtën kohë, dhe disa zonja të para, si Melania, kanë më shumë probleme me këtë sesa të tjerët”.
Ajo lindi si Melania Knavs në prill 1970 në Slloveni, atëherë pjesë e Jugosllavisë. Nëna e saj ishte rrobaqepëse dhe babai i saj shitës makinash. Ajo studioi dizajn dhe arkitekturë para se të shkonte në Milano dhe më pas në Paris për të filluar një karrierë modelizimi.
Kjo e solli atë në Shtetet e Bashkuara në 1996, ku ajo u takua me Trump dy vjet më vonë. Melania Trump u bë një qytetare e SHBA në 2006, të cilën ajo e përshkroi si “privilegjin më të madh në botë”.
Zonja e Parë që nuk ka lindur në SHBA.
Përvoja e saj amerikane është me të vërtetë e tillë, që nga jetesa në një apartament luksoz në Trump Tower në New York deri te qëndrimi në një rezidencë në Florida. Melania fillimisht nuk i mbështeti ambiciet e Trump për të hyrë në Shtëpinë e Bardhë.
“Ajo tha: Ne kemi një jetë vërtet të shkëlqyer. Pse dëshiron ta bësh atë?”, ishin fjalët e Trump në një intervistë për Washington Post.
Ajo u bë e para Zonjë e Parë që nuk lindi në Amerikë në dy shekuj. Para saj ishte britanikja Louisa Adams. Burri i saj John Quincy Adams ishte president nga 1825 deri në 1829.
Donald Trump u transferua në Shtëpinë e Bardhë në janar 2017, por Melania dhe djali Barron u bashkuan me të vetëm në qershor kur mbaroi viti shkollor i 11-vjeçarit.
“Unë pres me padurim kujtimet që do të krijojmë në shtëpinë tonë të re!,” shkroi Melania në Twitter në atë kohë. Por në Uashington, ajo shpejt e gjeti veten në qendër të zhvillimeve politike.
Ajo fitoi përçmim prej veshjes në gusht 2017 kur shkoi për të vizituar Teksasin e goditur nga stuhia, edhe pse ndryshoi atletet para se të dilte nga aeroplani.
Duhet të përmirësojë imazhin
Në qershor 2018, ajo shkoi në kufirin SHBA-Meksikë për të parë fëmijët migrantë. Ajo kishte veshur një xhaketë ku shkruhej “Me të vërtetë nuk më intereson, apo jo?”
As veshja e një përkrenare të bardhë në stilin kolonial në një vizitë në Kenia disa muaj më vonë nuk e ndihmoi atë.
Profesorja e historisë Katherine Jellison e Universitetit të Ohajos beson se ajo mund të përmirësojë imazhin e saj “nëse do të shfaqej më shumë në publik dhe të pranonte më shumë intervista, por me zgjedhje të kujdesshme të fjalëve dhe veshjeve”.
Fuqia e saj më e madhe si Zonjë e Parë është aftësia e saj për të treguar qetësi dhe dhembshuri, diçka me të cilën burri i saj lufton, veçanërisht kur bëhet fjalë për çështje të ndezura si COVID-19 dhe tensionet në rritje racore.
Megjithëse ajo nuk ishte aq e pranishme në fushatë këtë vit, pjesërisht për shkak të luftës së saj kundër virusit koronar, fjalimi i saj në kongresin republikan në gusht mblodhi vlerësime.
Gjithmonë me burrin e saj
“Kurdoherë që ai ka nevojë për një deklaratë të madhe mbështetjeje, shfaqet ajo,” tha Jellison.
“Donald është një luftëtar. Ai e do këtë vend dhe lufton për ju çdo ditë,” tha Melania të martën në një tubim elektoral në Pensilvani, një nga fushat kryesore të betejës në fushatën zgjedhore.
Brower parashikon që Zonja e Parë aktuale do të tërhiqet edhe më shumë nga publiku nëse Trump fiton një mandat të dytë.
“Ajo është një person shumë i tërhequr”, tha Brower për AFP, libri i fundit i të cilit, “Ekipi i Pestë: Klubi i Presidentëve në epokën e Trump”, u botua në maj të këtij viti. /tesheshi.com/
