Disa të panjohura për liderin katalanas: përkthimi i mbiemrit dhe fama shekullore e pastiçerit

Tashmë dihet nga të gjithë se njeriu më i famshëm në Europë, Carles Puigdemont, është një indipendentist i lindur.

Ndryshe nga shumë familje në Barcelonë dhe rrethinat e saj, që kanë përshtatur në spanjisht strukturën etimiologjike të emrit, presidenti i shkarkuar i Katalonjës çdo tabelë dhe emërtim, denbabaden e ka në gjuhën e të parëve, katalane e pastër.

Dhe po ta përkthesh frazën “Puigdemont”, do të thotë “majëmali”.

Carles, as që e kishte menduar se do të kthehej një ditë në njeriun që “dridh Spanjën dhe Europën”,  por priste të ishte njëri prej hallkave të zinxhirit të madh të pastiçerive dhe shitjeve të bimëve shëruese në të gjithë Katalonjën.

Puigdemont është një nga markat më të famshme jo vetëm në metropolin më të njohur të Spanjës-Barcelonë, por në të gjithë rajonin e Katalonjës.

Prej 200 vitesh e më shumë, kjo familje ka trashëguar brez pas brezi mjeshtërinë e brumit dhe përpunimit të sheqerit, mjeshtëri që një parardhës i lashtë i tyre e solli nga Orienti.

Puigdemont u bë fare rastësisht president i partisë së tij, e më pas edhe i rajonit të Katalonjës.

Në kohën kur Arturo Mas, lideri historik indipendentist po vihej në morsë për ta larguar prej tre rrymave të fuqishme politike pro-pavarësisë në rajon, ai nxori si kartë rezervë kryebashkiakun e bashkisë së Gironas, gazetarin e sertë dhe me nam “se është i drejtë”, Carles Puigdemont.

“El Puidgi”, nofkën me të cilin e kanë thirrur që i vogël, ka futur në sherr gjithë shtypin botëror, se si ta shqiptojnë emrin dhe mbiemrin e tij.

The New York Times, ka dhënë për lexuesit e saj një version fonetik të vetin: “Mister POOTCH-da-mon”.

Xhaxhai i tij Josep, titullari i “Pastisseria Puigdemont” në qytetin Amer thotë se “Carles është një luftëtar i pavarësisë e jo politikan. Ai nuk ka asnjë nevojë në jetën e tij. Kanë punuar stërgjuyshërit tanë për ne, na kanë lënë recetat e mrekullirave që kënaqim e ëmbëltojmë gjithë botën që viziton Katalonjën, por këtë luftë e ka mision nga historia jonë e shtypjes shekullore nga një klikë e mbretëri që nuk di gjë tjetër vetëm të dhunojë popujt e tjerë”. /tesheshi.com/