Nga Blendi Gashi
Gazi lotsjellës dhe tymi vazhdojnë të jenë kryefjala në Kuvendin e Kosovës për më shumë se tre muaj.
Ashtu ndodhi edhe të hënën ku në Parlament dhe rreth tij ndodhën shumë gjëra që tashmë qytetarët janë mësuar t’i shohin, si hedhje e gazit, hyrje e sigurimit në sallë, suspendim të deputetëve opozitarë dhe protesta në rrugë.
Zgjidhja nuk po shihet askund. E vetmja mënyrë për të tejkaluar këtë mospajtim të madh mes pozitës dhe opozitës, aktualisht shihet mbajtja e zgjedhjeve që është edhe kërkesë e partive opozitare nëse mazhoranca këmbëngulë se nuk do të merr vendim për anulimin e Asociacionit dhe Demarkacionit.
Duke parë çfarë ngjau edhe një ditë tjetër me Kuvendin dhe mbylljen hermetike të pozitës dhe opozitës për të mos gjetur një gjuhë të përbashkët, kanë ardhur sërish reagime të shumta të njohësve të rrethanave politike në vend e gazetarëve.
Analisti Astrit Gashi, thotë se si faktor destabilizues që janë edhe pushteti edhe opozita do të mbijetojnë, duke thënë se të dy palët e dijnë këtë punë.
“E ne si faktor stabiliteti- do vazhdojmë ta shikojmë vendin tonë nga distanca si me qenë një vend i huaj. Dhe prapë do ti votojmë- natyrisht në emer të stabilitetit”, ka shkruar Gashi në Facebook.
Njohësja e rrethanave politike në vend, Besa Luzha, përmes një shkrimi në Facebook ka shkruar se gjithçka ka humbur kuptimin!
“Një shoqëri që nuk arrin ti zgjidhë dy probleme të zgjidhshme nuk mund të ndërtojë të ardhme të mirë!”, ka shkruar Luzha.
Analisti politik Donik Sallova, ka shkruar në Facebook se deputetët e mbetur të opozitës duhet të futen në grevë urie brenda sallës së Kuvendit, përndryshe, së shpejti të gjithë prej tyre do ta hanë bukën nëpër tasat e mencave të burgut!
Gazetari Milaim Zeka thotë se presidentja duhet të shpall zgjedhjet e reja:
“Mirësjellja e Kadri Veselit dhe gazi lotsjellës. Po e shohim të gjithë lojën absurde teatrale që po bëhet në Kuvendin e Kosovës.
Kadri Veseli paska dalë vet nga salla rezervë, për t’i marrë tri deputete të opozitës. Ato, zoti e din se prej nga, po kryesorja e kanë nxjerrë gazin, edhe e kanë hudhë.
E para, shyqyr që nuk kanë nxjerrë najsen tjetër, se me gaz jemi mësuar.
E dyta, u ba një testim i deputeteve për raste emergjente.
Edhe e treta, ishalla një ditë, Kadri Veseli, i merr këta deputet e i çon nëpër shtëpia, ara e avlija, edhe i thote bre Atkes (Atifete Jahjagës), me i shpallë zgjedhjet e reja. Aman, se horë u bëmë para diasporës tonë, edhe botës të civilizuar…”, ka shkruar Zeka, në Facebook.
Gazetari tjetër, Adritaik Kelmendi, pashtu përmes një postimi në profilin e tij në Facebook ka thënë se edhe nëse vendi shkon në zgjedhje të reja me njerëz të njëjtë në politikë, do të servohet çorbë e njëjtë.
“Kur ta këqyrsh, nëse nuk ka njerëz të rinj, ose ndonjë forcë të re politike ndërkohë, nuk do të ketë fare kuptim as shkuarja në zgjedhje.
Këta 120 deputetë që sot janë të zgjedhur në Kuvend, po tregohen krejtësisht të paaftë të gjejnë zgjidhje për problemet dhe e kanë kthyer organin përfaqësues në një cirk të lirë tragji-komik.
Çka do të mund të zgjidhet me të njëjtit njerëz?!
Me përbërës të njëjtë, do të kemi çorbë të njëjtë!!!
E kjo gjithësesi se do të mbetet në histori si përbërja më e dobët parlamentare ndonjëherë!…”, thotë Kelmendi.
/tesheshi.com/
