Transplanti i organeve mund të ndihmojë në shpëtimin e shumë jetëve por njëkohësisht mund të ketë edhe dilema të mëdha morale për familjarët e dhuruesit. Dhuruesit e organeve të shëndetshme mund të shpëtojnë mbi 8 jetë njerëzish duke u dhënë pacientëve në nevojë një shans për të jetuar një jetë të lumtur dhe të shëndetshme. Familjet, megjithatë, nuk e praktikojnë shpesh këtë metodë për shkak të arsyeve fetare apo edhe politike.
Sipas Emory Healthcare, rreth 115 mijë pacientë presin të marrin organe nga viti në vit në Shtetet e Bashkuara të Amerikës dhe shumë prej tyre që arrijnë të realizojnë operacionet në kohën e duhur, e parandalojnë vdekjen.
Për marrësin e organeve, humbja e jetës së një njeriu u jep atyre një shans të dytë në jetë. Transplanti i organeve në shumë raste mund të reduktojë në mënyrë të dukshme apo të eliminojë kostot e trajtimeve të shtrenjta dhe të mjekimeve të shumta që mbajnë pacientin në jetë.
Për më tepër, transplanti i jep mundësinë pacientit për të jetuar një jetë normale. Veç kësaj, shpesh familjarët e dhuruesit ndjejnë mirësinë që kanë arritur të shpëtojnë një jetë njeriu, edhe pse personi i tyre i dashur është larguar nga kjo jetë.
Mirëpo, dhurimi i organeve mund të ketë probleme të ndryshme, fillimisht të besimit fetar e më pas në aspektin politik apo atë social. Disa familjarë mund të kundërshtojnë në mënyrë absolute që organet e të afërmit të tyre t’i jepen një personi me një besim fetar të ndryshëm nga i tyri apo edhe me klasë socio-ekonomike tjetër. /tesheshi.com/
