Nëse dëshironi të humbisni peshë apo thjeshtë të përshtatni një mënyrë jetese të shëndetshme, duhet që të preferoni disa ushqime mes gjithë të tjerave.
Bukë e bardhë me reçel VS bukë integrale me gjalpë kikiriku
Sidomos për ata që nxitojnë për punë dhe që nuk kanë kohë të bëjnë një mëngjes të shëndetshëm zgjedhin për shkurt një tost me reçel, gjalpë ose çokokrem. Mirëpo përdorimi i karbohidrateve “të bardha” bën që t’ju rritet tensioni dhe nga ana tjetër të ndiheni të lodhur dhe të uritur shumë shpejt. Ndërkohë, gjalpi i kikirikut është një zgjedhje më e mirë se reçeli, i cili përmban plot sheqer, sepse është plot proteina dhe yndyrë bimore. Tosti me bukë integrale nuk do t’ju marrë aspak kohë më shumë. Është thjeshtë çështje zgjedhjesh kur jeni duke bërë pazarin.
Pije me gaz apo ujë me fruta dhe erëza?
Jo vetëm pijet me gaz por dhe ato pa gaz kanë shumë kalori dhe sidomos sheqer. Për të shmangur dëmet që shkaktojnë në shëndet përdorni ujë me copa frutash dhe erëza sipas dëshirës.
Gjellë me mish apo supë me zarzavate?
Një supë me zarzavate ndoshta me pak mish të bardh pule, por jo me lëng dhe yndyrë pule, është shumë herë më e shëndetshme sidomos për të marrë dozën ditore të lëngjeve që na nevojiten. Rrini larg nga ajo lloj supe me karbohidrate (makarona sherhije apo oriz), aq më tepër nga gjellët me yndyrë dhe mish të kuq.
Akullore të paketuar apo akullore shtëpie?
Akulloret e paketuar ashtu si ushqimet e tjera të paketuara, kanë një numër të pafund substancash të dëmshme si konservante, ngjyrues apo dhe sheqer të përpunuar. Por nëse vërtetë e ndjeni nevojën të freskoheni menjë akullore atëherë përgatiteni vetë në shtëpi dhe nuk është as e vështirë as e lodhshme. Mjafton të fusni në mikser fruta të ruajtura në akull derisa të bëhet një masë kremoze. Mund t’i shtoni dhe pak kos ose qumësht apo dhe fruta të thata sipas dëshirës.
Majonezë dhe salcë kosi apo kos grek?
Salca e kosit ka po aq yndyrë sa mund të ketë dhe majoneza, ndaj në pjata të ndryshme zgjidhja e duhur është kosi i bardhë pa yndyrë që njihet si kosi grek.
Makarona të bardha apo makarona kungulli?
Makaronat e bardha bëhen nga një lloj mielli i përpunuar dhe aspak i shëndetshëm. Por nëse ju ka shkuar mendja për makarona atëherë merrni një kungull ose dy dhe i prisni me një qëruese lëkurash ose brenda mundësive me makineri grirëse. Zieni kungullin e grirë duke bërë kështu një pjatë të ngjashme me shijen e makaronve.
Musli të paketuara apo miks frutash të thata?
Shumë njerëz mashtrohen nga paketat e vogla me musli, të cilat duken si një ushqim dietik. Problemi qëndron te fakti se këto paketa përmbajnë konservantë dhe sheqer. Më mirë zgjidhni një miks frutash të thata dhe i paketoni në qese të vogla në mënyrë që t’i merrni me vete kudo për të luftuar krizat e urisë. Edhe ndër frutat e thata ka të tilla që janë më pak të shëndetshme si rrushi i thatë, fiqtë e thatë, kirikë me kripë etj., si dhe të tjera që janë më të shëndetshme si bajamet, lajthitë, arrat etj. /tesheshi.com/
