Një banor i Katarit dhe njëkohësisht blogeri Glen McKay ka nisur të agjërojë që prej vitit 2010, edhe pse nuk ishte mysliman. Ai jep disa këshilla se përse çdo person që nuk është mysliman duhet ta provojë qoftë edhe një herë të vetme në jetën e tij agjërimin gjatë muajit të madhërishëm të Ramazanit.
“Unë nuk jam mysliman ndaj askush nuk pret që unë të agjëroj gjatë Ramazanit. Kur dikush e merr vesh që jam duke agjëruar, më bën me të drejtë pyetjen: Pse? Mendoj se ka një numër të madh arsyesh pse unë dhe kushdo duhet të agjërojë”, – thotë ai.
Pikë së pari, vetë agjërimi, për jo myslimanët, mund të shikohet si një lloj aventure, e cila ju largon nga rutina e përditshme. Koha kur ju hani, kur flini, kur shkoni për të bërë pazar apo për të takuar miqtë tuaj, ndryshon gjatë agjërimit. Mund ta gjeni veten më shumë të përfshirë në aktivitetet dhe jetën e qytetit, kur dyqane të shumta hapen gjatë natës, duke respektuar muajin e shenjtë.
“Ky ishte motivimi im më i madh që më shtyu ta provoja agjërimin. Vura re se në mbrëmje isha i lodhur dhe shkoja menjëherë të flija, ndërsa gjithë të tjerët nisnin aktivitetet e tyre të këndshme, duke filluar që nga blerja e ushqimeve, ulja në tyrezë etj”, – tregon Glen McKay.
Kjo është edhe një mënyrë shumë e mirë për të njohur më shumë kolegët dhe miqtë tuaj myslimanë. Ju mund tu kërkoni atyre këshilla si të agjëroni (veçanërisht si të përballoni ditët e nxehta pa pirë ujë), apo të diskutoni se çfarë mund të përgatisni për iftar, apo se si ta përballoni agjërimin kur keni fëmijë të vegjël, për të cilët duhet të kujdeseni.
Nëse nuk njihni asnjë mysliman, atëherë mund të vizitoni qendrat kulturore islamike dhe aty të diskutoni me të pranishmit. Në rast se punoni me miq që agjërojnë, do të kuptoni lehtësisht se mëngjeset janë më të mira për të bërë mbledhje apo punë të tjera dhe me shumë mundësi do të lini të gjitha oraret e punës për në mëngjes herët.
Edhe nëse vendosni të mos agjëroni më, mund të takoni njerëz të tjerë gjatë muajit të Ramazanit, e kështu do ta keni më të lehtë të kuptoni se cila është sakrifica e tyre. Ata kanë për ta vlerësuar faktin që ju jeni përpjekur të paktën një herë të agjëroni. /tesheshi.com/
