Presidenti Hashim Thaçi, i cili ka diplomuar për histori por pa e ushtruar asnjë ditë profesionin e historianit, është përpjekur që për herë të parë të shfaqet i tillë, pra i ndjeshëm ndaj kësaj shkence.
Ai, në kuadër të 50-vjetorit të themelimit të Institutit të Historisë “Ali Hadri”, ka folur për rëndësinë e këtij instituti ndër vite, me ç’rast ka thënë se është një ndër institucionet më të rëndësishme shkencore të Kosovës, andaj meriton të vlerësohet për kontributin që ka dhënë.
Duke vlerësuar lart figurën e historianit, emrin e të cilit e mban vetë Instituti i Historisë, presidenti Thaçi, tha se Ali Hadri e ndjeu peshën e diferencimit dhe anatemimit nga politika komuniste jo vetëm jugosllave.
Kreu i shtetit kosovar shtoi se është mundësia e rishkrimit të historisë mbi bazën e objektivitetit dhe saktësisë shkencore.
“E them këtë për arsye se ende mendohet se mund të bëhet edhe më tepër për të zbërthyer të vërtetën e plotë edhe të kontributit të Kosovës në rolin e pavarësisë së Shqipërisë, rolin e Kosovës të periudhës në mes dy luftërave botërore, por para së gjithash tash flas pak edhe si historian, jo në grada ta larta shkencore”, shtoi Thaçi, ku në fakt edhe pse u vetëquajt i tillë, nuk i njihet ndonjë punim apo vepër studimore që mund ta rendiste tek historianët, pasi veç është diplomuar në histori; ngjashëm si Ilir Meta në Shqipëri, që edhe pse është diplomuar në ekonomi, nuk njihet si ekonomist.
Gjithsesi, Thaçi ka bërë thirrje që mos të deformohet e kaluara.
“Si student i shumicës prej jush, që para së gjithash të mos na ndodhin deformime siç kanë ndodhur në të kaluarën, kur një studiues magjistronte me temën ‘Kundërrevolucioni në Drenicë’, ndërsa doktoronte me temën ‘Lufa çlirimtare në Drenicë’ për të njëjtën periudhë, për të njëjtat personalitete”, tha Thaçi.
Duke iu premtuar përkrahjen e shtetit për të vërtetën dhe historinë e kombit tonë, Thaçi tha se meriton të thuhet e vërteta e pandikuar politikisht, ideologjikisht apo rajonalisht. /tesheshi.com/
