Shaban Murati është një nga diplomatët publicist më të njohur, por edhe aktiv në publik në shpalosjen e mendimeve të tij që janë të hidhura dhe kritike, ndaj realiteteve të zymta në vend.
Ish-ambasador në Maqedoni, pikërisht në fillimet e viteve ‘90 dhe më pas në disa vende të tjera, por edhe drejtues i Akademisë Diplomatike për disa vjet, Shaban Murati ka qenë gjithnjë përkrahës i hartimit të një strategjie kombëtare nga shteti në mënyrë që të mbrohemi me argument dhe shkencërisht nga rreziku sllav.
Prej tashmë një viti ai është tërhequr nga shërbimi aktiv në diplomaci, por është kyçur aktivisht në opinionin publik me opinionet e tij në rubrikën “Katovica” në Gazetën Shqiptare por edhe në rrjetet sociale.
Thuajse çdo ditë, Shaban Murati, i cili përpara se diplomat e ka nisur karrierën si gazetar, shkruan statuset e tij, të cilat përmbajnë jo vetëm informacion por realisht janë “shpuzë” për nga argument dhe faktet që sjell.
Nga më pikantet e statuseve të zotit Murati ka qenë pikërisht ai ditën e protestës së PD-së më 18 shkurt, ku çuditshëm valëvitej flamuri i Izraelit në mes të protestës.
Për këtë fakt, diplomati i njohur shtron pyetje por edhe akuzon.
“Për herë të parë në historinë e Ballkanit, të Shqipërisë dhe të demokracisë, në një protestë politike antiqeveritare në mes të Tiranës shqiptarët dolën edhe me flamurin e Izraelit. Askush në të dy trotuarët politikë, mediatikë, shoqëricivilistë dhe levantinistë nuk dha shpjegim dhe nuk kërkoi shpjegim përse organizatorët e lejuan këtë simbolikë të paprecedent, e cila shtoi listën e shumë gjërave sui generis shqiptare. Po nëse dikush, larg qoftë, në një protestë politike antiqeveritare në Tiranë të kishte ngritur flamurin e Turqisë, çfarë do të kishte ndodhur në trotuarët politikë, mediatikë, shoqëricivilistë dhe levantinistë shqiptarë?”
Ndërkaq, i shtyrë edhe nga debate pa kufi për Sorosin dhe rolin e tij në Shqipëri, Shaban Murati ka një tjetër qëndrim ku përveçse akuzon ata që kanë përfituar nga paratë e miliarderit hebreo-amerikan, por edhe ngre pikëpyetjen për mediat që nuk kanë folur kurrë për financimet e shërbimeve secrete serbe në Shqipëri. Ja statusi i plotë:
Se sa i mjerë është niveli moral dhe intelektual i “shoqërisë civile” në Shqipëri, e tregon fakti se nga dhjetra shoqata, fondacione, institute, borde dhe figura publike, që Xhorxh Sorosi i ka mbajtur me para për 25 vjet rresht dhe i ka bërë me vila, me apartamente, me shtëpi pushimi në det e në mal, nuk u ngrit asnjeri në mbrojtje të dorës, që i ka pasuruar. Është një dëshmi, ndër të shumtat, se fjala “mirënjohje” nuk banon në fjalorin e gjuhës shqipe.
2-Përse gjithë kjo fushatë për Sorosin dhe milionat e dollarëve për njerzit e tij në Shqipëri dhe nuk pati kurrë fushatë për Sllobodan Millosheviçin dhe milionat e dollarëve për njerzit e tij në Shqipëri? Mirë, që po bëhen listat për njerëzit e Sorosit në Shqipëri, por si nuk u bënë kurrë dhe nuk po bëhen kurrë listat për njerzit e Millosheviçit dhe të Serbisë në Shqipëri? /tesheshi.com/
