Situata e tensionuar në Shkup e shoqëruar me demonstrata dhe protesta antiqeveritare ka nxitur reagimin edhe të diplomatëve perëndimorë.
Janë ish-ambasadorë të vendeve të BE-së që kanë reaguar menjëherë pas situatës së tensionuar në Shkup.
Ish-ambasadori i BE-së në Maqedoni, Ervan Fuere ka shkruar në profilin e tij në rrjetet sociale se përkrahë qytetarët në protestat para Qeverisë në Shkup.
“Nuk ka gurë apo mur që të mbajë pakënaqësinë e njerëzve, nuk do të mund të mbrohen ata që po fshihen pas tyre, ata që kanë humbur kredibilitetin dhe legjitimitetin për të mbetur në pushtet. Tani është koha për ndryshim. Të rinjtë po protestojnë kundër brutalitetit policor”, ka shkruar Fuere.
Ish-ambasadorja e Holandës në Shkup, Simone Filipini në rrjetin social Facebook ka shkruar se është koha për ndryshime në Maqedoni.
“Koha është për ndryshime në Maqedoni. Përmes një drejtimi pozitiv dhe një udhëheqësie pozitive, ky vend mund të zhvillohet. Saqë kam arritur të shoh dhe të dëgjojë për këtë, qytetarëve të këtij vendi i është mbushur kupa me negativizma”, ka shkruar Filipini.
