Pas udhëheqësve, ministrat e jashtëm të vendeve anëtare të BE do të diskutojnë gjithashtu në një takim të sotëm rishikimin e strategjisë për shpërndarjen e vaksinave kundër COVID-19 në vendet e treta, kryesisht Ballkanin Perëndimor dhe fqinjët.
Takimi i Këshillit të Punëve të Jashtme do të kryesohet nga kryediplomati i BE, Josep Borrell.
Siç është njoftuar në Bruksel, pika e parë në rendin e ditës do të jetë prezantimi nga Borrell i strategjisë së BE për shpërndarjen e vaksinave kundër COVID-19 në vendet e treta dhe përpjekjet e tjera të BE për të siguruar qasje të barabartë dhe të drejtë në vaksinat e sigurta globalisht.
Ministrat do të shkëmbejnë mendime dhe mbi arrestimin e fundit të politikanit rus të opozitës Alexei Navalny pas kthimit të tij në Rusi më 17 janar 2021.
Këshilli gjithashtu do të diskutojë marrëdhëniet transatlantike, me synimin për angazhimin e ardhshëm me administratën e SHBA pas inaugurimit të Joe Biden si presidenti i 46-të amerikan.
Ministrat pritet të mirëpresin vendimet e marra nga presidenti i ri i SHBA gjatë ditëve të para të mandatit të tij, veçanërisht kur bëhet fjalë për kthimin në Marrëveshjen e Klimës së Parisit dhe OBSH. /tesheshi.com/
