Emërimi i Matthew Palmer si Përfaqësues Special i Sekretarit të Shtetit të SHBA për Ballkanin Perëndimor tregon një interes më të madh të administratës amerikane në rajon, por e lë të hapur pyetjen nëse qëllimi është që të shpejtohet zgjidhja e çështjes së Kosovës, ku enden dhe disa ide të rrezikshme (këmbimi i territoreve) – thonë ekspertët e Ballkanit në Uashington.
Profesori i Universitetit Johns Hopkins, Daniel Server e konsideron emërimin e Palmerit, edhe si qëllim të administratës amerikane për të nxituar zgjidhjen e çështjes së Kosovës në pritje të zgjedhjeve në SHBA.
“Pas emërimit, unë do të shpresoja për një politikë më të qartë të SHBA për ndryshimin e kufijve dhe koordinim më të mirë me Evropën, por kam frikë se qëllimi është ngutja për të arritur një marrëveshje përpara zgjedhjeve presidenciale të SHBA në nëntor 2020”, thotë Server për VOA-n në gjuhën serbe.
Serveri kujton që ka shumë pyetje të tjera të hapura kur bëhet fjalë për rikthimin e dialogut Beograd-Prishtinë dhe arritjen e një zgjidhjeje të shpejtë.
“Nuk ka shumë kuptim derisa të mbarojnë zgjedhjet në Kosovë, të formohet një qeveri e re dhe të zhvillohet një platformë e re negociuese”, thotë Server.
Ndërsa eksperti dhe pedagogu i Ballkanit po në Universitetin Johns Hopkins, Edëard Joseph thotë se emërimi i Palmer është i rëndësishëm për disa arsye.
“Së pari, ajo sinjalizon interes dhe angazhim më të madh të SHBA në Ballkan. Emërimi i një Përfaqësuesi Special nuk është një vendim i thjeshtë për t’u marrë. Qëllimi është që përfaqësuesi të ketë përgjegjësi më të madhe për të folur direkt në emër të Sekretarit të Shtetit. Kjo tregon qëllimin e SHBA për të pasur një ndikim më të madh në rajon, me siguri në zgjidhjen e çështjes së Kosovës, ndër shumë çështje të tjera “.
Joseph thotë se Palmer është një diplomat i aftë dhe i përkushtuar; i aftë për dinamikën e rajonit dhe mund të jetë shumë i efektshëm në avancimin e qëllimeve të SHBA. /tesheshi.com/
