Si çdo vit, në Tiranë u festua Dita Kombëtare e Katarit, një ndër vendet e pasura të Gjirit, i cili i është gjendur Shqipërisë me ndihmë të shumëanshme, ç’prej kur ekzistojnë marrëdhëniet diplomatike mes dy vendeve.
Ambasada e këtij shteti arab, tashmë dhe me aureolën e organizatorit të më të mirit Botëror Futbolli në historinë e këtij eventi të madh, në nëntor-dhjetor 2022, organizoi një ceremoni pritjeje me rastin e Ditës së tij Kombëtare, ku ishte e pranishme një pjesë e mirë e elitës zyrtare të Tiranës, si ministri i Jashtëm Igli Hasani, krerë dhe përfaqësues të misioneve diplomatike dhe organizatave ndërkombëtare të akredituar në vend, kryetarë të bashkive, si dhe shumë personalitete të politikës, biznesit, medias, artit etj.
Gjatë fjalës së tij me këtë rast, ambasadori i Katarit në Shqipëri, z. Jabor bin Ali Al Dosari, theksoi se festimi i Ditës Kombëtare më 18 dhjetor të çdo viti synon përkujtimin e themeluesit Sheikh Jassim bin Mohammed bin Thani, i cili hodhi themelet e shtetit modern të Katarit.
“Kjo ditë rrënjos sensin e krenarisë për identitetin dhe përkatësinë kombëtare dhe pasqyron unitetin dhe solidaritetin e popullit katarian nën udhëheqjen e urtë të Lartësisë së Tij Emirit, Sheikh Tamim bin Hamad Al Thani”, tha ai.
Ambasadori vuri në dukje se Shteti i Katarit zë sot një pozicion të veçantë e gjithnjë në rritje në arenën rajonale dhe ndërkombëtare, falë arritjeve të tij të gjithanshme dhe të pashembullta, duke spikatur në komunitetin ndërkombëtar me një politikë të jashtme të ndërtuar mbi bazën e bashkëpunimit dhe miqësisë.
“Këto arritje e kanë kualifikuar Katarin të luajë rolin e një ndërmjetësi të suksesshëm në zgjidhjen e shumë mosmarrëveshjeve përmes mjeteve diplomatike, veçanërisht në zgjidhjen e krizës dramatike që përjeton Lindja e Mesme aktualisht. Katari është i angazhuar me partnerët e tij ndërkombëtarë për të arritur një armëpushim të përhershëm dhe një zgjidhje të drejtë për Çështjen Palestineze, në përputhje me rezolutat ndërkombëtare dhe Iniciativën Arabe për Paqe”, nënvizoi ai.
Në përfundim të fjalës së tij, ambasadori Jabor bin Ali Al Dosari, theksoi marrëdhëniet solide dhe lidhjet e ngushta të miqësisë ndërmjet Katarit dhe Shqipërisë e Kosovës, si dhe rikonfirmoi përpjekjet e
vahdueshme të ambasadës së Shtetit të Katarit në Tiranë për të thelluar marrëdhëniet dypalëshe dhe mbështetur të çdo nismë që kontribuon në zgjerimin e aspekteve të bashkëpunimit në të gjitha fushat, në dobi të vendeve dhe popujve tanë miq.
Kujtojmë se Katari është njëherësh dhe aleati më i afërt i Turqisë në Gji, ku të dy formësojë dhe diktojnë gjeopolitikat rajonale e me gjerë, mes të cilëve Shqipëria ndihet komode, duke u patur mbështetje në çdo rrethanë. Katari është gjithashtu vendi ku diplomacia botërore negocion dhe për paqen në vatrat e trazuara të Lindjes së Mesme. /tesheshi.com/
