Hungaria po planifikon të emërojë një diplomat për të kryer “punë konsullore” në Damask vitin e ardhshëm. Kjo është hera e parë që një shtet anëtar i BE-së do të përmirësojë praninë e tij diplomatike në Siri që nga fillimi i luftës.
“Duke filluar nga viti i ardhshëm, Hungaria do të delegojë një diplomat i cili kohë pas kohe do të vizitojë Sirinë për të përcjellë nga afër dërgimin e ndihmave humanitare dhe për të kryer punë konsullore”, tha Ministria e Jashtme e Hungarisë në një deklaratë për AFP të Mërkurën.
Ministria tha se Budapesti ofron ndihmë humanitare për të krishterët në Lindjen e Mesme, përfshirë Sirinë, ndërsa një “numër i konsiderueshëm” i studentëve sirianë studiojnë në Hungari me bursa.
Vetëm Republika Çeke ka ende ambasadë në Damask, ndërsa vendet e tjera të BE-së, SHBA-ja dhe Kanada janë ndër vendet që kanë mbyllur misionet e tyre, duke shkëputur marrëdhëniet me regjimin e Presidentit Bashar al-Assad.
Rumania teknikisht ka ende ambasadë në Siri, por ambasadori është me qendër në Bejrut të Libanit. Bullgaria ka një të ngarkuar me punë atje.
Vendet e BE-së në të kaluarën kanë pasur persona të dërguar në Siri, por jo për qëllime konsullore por vetëm me detyra të kufizuara në bisedime për ndihmë humanitare. /tesheshi.com/
