Presidenti rus Vladimir Putin ka kundërshtuar sërisht rritjen e sanksioneve ndaj Phenianit, duke thënë se kriza rreth testeve me armë bërthamore në Korenë e Veriut mund të zgjidhet me “rrugë diplomatike”.
Duke folur në një forum ekonomik në Rusi, Putini deklaroi se Pheniani nuk do t’i japë fund programit nuklear, sepse për të, kjo është e vetmja mënyrë për vetëmbrojtje.
“Është e pamundur t’i frikësojmë ata”, ka thënë Putin.
Kryeministri japonez, Shinzo Abe ka folur në të njëjtin forum, ku përsëriti thirrjen e tij për Botën që “t’i bëjnë presion shumë të madh” Koresë së Veriut për të përmbushur obligimet e OKB-së dhe të pezullojë programin e armëve.
Komentet vijnë pasi SHBA propozoi sanksione të reja të OKB-së ndaj Koresë së Veriut, pasi kjo e fundit ka bërë testimin e gjashtë të bombës nukleare.
Draft propozimi i SHBA-ve është shpërndarë te anëtarët e Këshillit të Sigurimit të OKB-së dhe ai bën thirrje, mes tjerash, për ndalim të furnizimit me naftë të Koresë së Veriut.
Nuk është e qartë nëse Kina, aleatja kryesore e Koresë së Veriut, do t’i mbështesë këta hapa të rreptë ndaj Phenianit.
Ministri i Jashtëm kinez, Wang Yi ka thënë se Këshilli i Sigurimit duhet t’i përgjigjet Koresë së Veriut, por shtoi se sanksionet janë vetëm gjysma e zgjidhjes së problemit dhe se duhet të kombinohen me dialog dhe negociata./tesheshi.com/
