Trupat e operacioneve speciale të Shteteve të Bashkuara kanë nisur partneritetin me trupat turke dhe me një kontigjent të grupeve nga opozita siriane, për një operacion të ri në Sirinë e veriut, raporton “Washington Post”.
Kjo lëvizje vjen vetëm disa javë pasi Turqia nisi një operacion blic përgjatë kufirit të vet, duke marrë në kontroll qytetin verior të Jarabulusit dhe duke injektuar një dinamikë të re në konfliktin pesëvjeçar në Siri.
Zëdhënësi i Pentagonit, Jeff Davis tha përmes një deklarate se kontigjenti i trupave të operacioneve speciale që është vendosur në mbështetje të forcave siriane dhe turke rreth qyteteve Jarabulus dhe Al-Rai, është dërguar atje me kërkesë të qeverisë turke.
Megjithatë është ende e paqartë sesa trupa amerikane janë dërguar në mbështetje të operacioneve në kufirin turk, edhe pse një video e postuar online shfaq një dyzinë trupash amerikane që tërhiqen jashtë qytetit Al-Rai.
“Personeli amerikan që operon me forcat turke dhe opozitën siriane do të japë të njëjtën mbështetje, trajnim dhe këshillim që kanë dhënë edhe ndaj partnerëve të tjerë lokalë në Siri që luftojnë me militantët”, thuhet në deklaratë.
Marrëdhënia e re e partneritetit të Shteteve të Bashkuara me Turqinë dhe me atë që Pentagoni e cilëson “opozitë të skanuar siriane”, vjen në një kohë që Uashingtoni kërkon të ulë tensionet mes turqve dhe forcave kurde që mbështeten nga amerikanët, të cilat kanë luftuar kundër militantëve të ISIS përgjatë kufirit turko-sirian përpara nisjes së ofensivës së re të Turqisë.
Që nga pranvera e këtij viti, forcat amerikane të operacioneve speciale kanë qenë të angazhuara me luftërarët kurdë dhe forcat demokratike siriane, duke ndihmuar këto grupime të marrin kontrollin e një numri qytetesh të rëndësishme në verilindje të Sirisë nga duart e militantëve të ISIS.
Turqia, sidoqoftë, e konsideron YPG-në e luftëtarëve kurdë një zgjatim të grupit terrorist PKK, apo partisë së Punëtorëve të Kurdistanit, dhe e ka bërë mjaft të qartë se nuk e mirëpret praninë e forcave kurde kaq pranë kufirit të saj.
Ndërsa forcat tokësore turke hynë në Siri, Pentagoni u përpoq të dekonfliktizojë kurdët dhe trupat turke, dhe kërkoi nga të parat të tërhiqen në lindje të Eufratit. Pas kundërshtimeve të vogla e përplasjeve me turqit, kurdët u tërhoqën.
Me forcat amerikane që tashmë janë të angazhuara me turqit, por që në të njëjtën kohë bashkëpunojnë me kurdët, Pentagoni duket, sipas “Washington Post” se po vendos një linjë komunikimi midis dy grupeve në mënyrë që ata të mbeten të fokusuar tek luftimet ndaj ISIS dhe jo ndaj njëri-tjetrit.
Në prill, Shtëpia e Bardhë autorizoi deri në 300 trupa të operacioneve speciale për t’u vendosur në Siri. Sipas një zyrtari të mbrojtjes amerikane që flet për gazetën në kushtet e anonimatit, instalimi i ri i forcave amerikane me ato turke është kërkuar nga sekretari i Mbrojtjes, Ashton B. Carter dhe u miratua nga presidenti Obama. Nuk është e qartë nëse vendosja e re e trupave në krah të atyre turke do të rrisë numrin e përgjithshëm të forcave amerikane në Siri.
Në të kaluarën, Pentagoni ka këmbëngulur që trupat nuk janë në “linjën e frontit” por në vend të kësaj, kanë mbetur në rolin këshillues, duke ndihmuar forcat lokale në shënjestrimin e sulmeve ajrore dhe duke i ndihmuar me planet operacionale. Në gusht, forcat demokratike siriane të mbështetura nga sulme të dendura ajrore të koalicionit që drejtohet nga amerikanët, morrën qytetin e Manbij. Edhe pse nuk ka të vrarë mes trupave amerikane në Siri, disa prej tyre janë plagosur.
Përgatiti: Juli Prifti- /tesheshi.com/
