Nga Musa Mustafa
Krimbat po dëmtojnë me të madhe pyjet në rajonin e Shalës së Bajgorës, por edhe në shumë pjesë të Kosovës. Përveç drunjve, krimbat po kërcënojnë edhe banorët e këtyre fshatrave si gjënë e gjallë, duke përfshirë këtu shtazët shtëpiake si dhe ato të egra.
“Krimbat janë duke bërë kërdi në pyjet e Bungut dhe Qarrit në rajonin e Shalës së Bajgorës”, ka thënë Brahim Smakolli, banor i fshatin Rashan.
Sipas tij, kjo gjendje është duke mbretëruar edhe në fshatrat Pasomë, Tërllabuq, Shilovicë, Tërrsten, Skrome, Skoqnje, Gumnishtë etj., etj.
“Nëse shteti nuk merr ndonjë aksion për spërkatjen e pyjeve, shumë shpejt dëmet do të jenë me pasoja të paparashikueshme”, ka thënë Smakolli.
Sipas tij, kimbat jo vetëm që shkaktojnë dëme në pyje, por po dëmtojnë së pari popullatën e Shalës, pasiqë paraqesin rrezik për lëkurën e njeriut nëse vihen në kontakt me të, pa llogaritur dhe dëmet në bagëti, si dhe në bletari.
Ai ka gjetur edhe arsyen e shumimit kaq të madhe të krimbave këtë vit.
“Shumim kaq i madh i krimbave ka ardhur për arsye të dimrit shumë të butë që ka mbretëruar këtë vit. Po të ishte dimri më i ashpër, nuk do të lejonte shumimin kaq të madhe të krimbave”, ka thënë Smakolli.
“Po na pyet për krimba?! Kjo po me duket hajgare! Udhëheqësia e jonë nuk ka kohë njëherë me u marr me krimbat që e shkatërruan malin, se ata janë tu u marr me politikë e karrige, se popullata dhe mali pret”, ka thënë për portalin tesheshi.com, Remzi Parduzi, banor i fshatit Vesekofc të Komunës së Vushtrrisë, me një të qeshur të lehët e me ironi.
Sipas tij, pyjet e Bungut e Qarrit janë të dëmtuar shumë nga krimbat, për të mos thënë se janë pranë shkatërrimit të tërësishëm, pra tharjes së tyre. Ndërsa gjendje më e mirë është tek pyjet me ahishte.
“Këso gjendje në malet e Shalës së Bajgores sa i përket krimbave unë ndonjëherë personalisht nuk e kam takuar, por prindërit e mi më kanë treguar se pas Luftës së Dytë Botërore, pothuajse mali është tharë nga krimbat”, ka thënë Shaljani.
“Kjo qenka shumë shqetësuese se krimbat përveç që dëmtojnë pyjet dëmtojnë direkt dhe indirekt edhe bujqësinë” ka thënë nga ana tjetër për portalin tesheshi.com, drejtori i Drejtorisë së Bujqësisë në Mitrovicë, Nasuf Aliu.
“Pas këtij informacioni, ne do të dalim në terren së bashku edhe me Agjensionin e Pyjeve, do të bëjmë vlerësim dhe komform kësaj do të reagojmë. Malet janë pasuria e jonë kombëtare, e në rajonin e Shalës së Bajgorës janë edhe mushkëritë e Mitrovicës”, ka theksuar Aliu.
Në anën tjetër, zyrtari i lartë për pyje në komunën e Mitrovicës, Irfan Peci, ka theksuar se zyrtarë komunalë nuk janë në dijeni se pyjet e Bungut dhe Qarrit në rajonin e Shalës së Bajgorës janë mbushur me krimba.
“Ne gjatë ditës do të dalim në terren dhe do të shikojmë nga afër gjendjen e pyjeve; dhe pas kësaj do t’i shkruajmë ministrisë përkatëse që të marrin masa në spërkatjen e tyre”, ka thënë Peci.
Në anën tjetër, zyrtarë të Agjensionit të Pyjeve të Kosovës në Mitrovicë, nuk kanë dashur që të prononcohem për këtë çështje me arsyetim se e kanë të ndaluar; dhe se për këtë duhet t’i drejtohemo Zyrës Qendrore në Prishtinës.
Por nga kjo zyrë e Agjensionit në Mitrovicë, i kanë thënë portalit tesheshi.com me kusht të anonimitetit se është e vërtetë q pyjet e Bungut dhe Qarrit janë mbushur me krimba; dhe se duhet urgjentisht një intervenim i qeverisë për spërkatje nga ajri. /tesheshi.com/
