Kakanji, qyteti boshnjak që suprizoi me vendimin e kreut të komunës për të mos festuar Vitin e Ri në shenjë solidariteti me Halepin e masakruar, po ofron një tjetër rast unik humaniteti.
Irma Grediq-Lopo është punonjëse në një dyqan rrobash në Kakanj, e specializuar për shitjen e veshjeve për fëmijë; por me veprimin e saj ajo ka dashur që të përfshijë banorët e të gjitha moshave.
Përmes aksionit “Ke një veshje tepër – lëre, ke nevojë për një veshje – merre”, sipas modelit të qyteteve tjera në Evropë, ajo dëshiron që të ndihmojë ata që në ditët e ftohta të dimrit nuk kanë veshjen e nevojshme.
“Këtë vit temperaturat janë siberiane, shumë njerëz nuk kanë mundësi të blejnë një veshje, gjithashtu ka edhe shumë raste sociale. Ne i mirëpresim të gjitha moshat, gjithë të rriturit që kanë veshje dimri ekstra në dollap, që t’i lënë ato në dispozicion për ata që kanë nevojë për to”, tha Grediq-Lopo.
Ajo thotë se aksioni do të zgjasë deri në fund të dimrit.
“Të shohim se sa vetë do t’i përgjigjen thirrjes. Sot, janë paraqitur disa njerëz të cilët kanë shfaqur interesim dhe kanë bërë pyetje. Të gjithë kanë thënë se kanë diçka ekstra nëpër dollape dhe se kjo është një ide e mirë dhe të gjithë janë të kënaqur me këtë fushatë humane”, shtoi Grediq-Lopo, duke thënë se ajo shpresonte se ky aksion do të përhapet edhe në qytete të tjera.
Ajo bëri thirrje që të gjithë ata që kanë nevojë për garderobë dimri, mund të vijnë para dyqanit në rrugën Branilaca, në Kakanj, ku do të mblidhen veshje për ata që kanë nevojë për to.
Irma Grediq-Lopo ka marrë dhe mbështetjen e menaxherit të dyqanit ku ajo punon. Ai vetë dhuroi veshje që mori nga garderoba e dy fëmijë të tij.
Një veprim i ngjashëm ka nisur edhe në disa qytete të tjera në Bosnjë dhe Hercegovinë, me shpresë që në këtë mënyrë të ndihmojnë të gjithë ata që në muajt e dimrit nuk mund të sigurojnë veshjet e nevojshme për t’u mbrojtur nga i ftohti. /tesheshi.com/
