E pezulluar në maj, Dilma Rousseff nuk do të jetë më presidentja e Brazilit, pasi senati i vendit ka votuar për largimin e saj nga detyra për manipulim të buxhetit.
Shumica e dy të tretave u arrit me 61 senatorë që votuan për shkarkimin e saj, ndërkohë që vetëm 20 qenë votat kundër.
Shkarkimi i Dilma Rousseff-it u jep fund 13 viteve në pushtet të Partisë së Punëtorëve, të nisura me presidencën e Lula da Silva-s.
Zëvendëspresidenti konservator Michel Temer, i cili po e kryen aktualisht detyrën e saj, do të betohet si president brenda së mërkurës, për ta ushtruar funksionin gjer në 1 janar të 2019-tës.
Rousseff nuk i ka pranuar për asnjë çast akuzat, duke i akuzuar rivalët politikë të së djathtës se janë përpjekur ta largojnë prej postit që prej rizgjedhjes së saj. /tesheshi.com/
