Nga Blendi Gashi
Ka shkaktuar një irritim shoqëror fakti që në mazhoranca kosovare nuk kaloi në parlament një amendament me anë të së cilit qeveria do siguronte asistentë e mësues për nxënës me aftësi të kufizuara, ose ndryshe me nevoja të veçanta.
Ndodhi kjo ndërsa javë më parë, kryeministri Haradiaj qerasi simbolikisht me nje kafe një person të tillë, në ditën e tyre më 2 dhjetor, e po ashtu ministri i Arsimit në kabinetin e tij, Shyqyri Bytyqi, premtoi se do ju sigurojë atyre arsim dhe aftësim, siç jua kërkon nevoja.
Por ja që në seancën e datës 22 dhjetor, deputetët e shumicës e rrëzuan amendamentin e iniciuar nga deputetja e Vetëvendosjes, Arbërie Nagavci, që parashihte ndarjen e shumës prej 739 mijë e 200 euro për gjithsej 150 mësues e asistentë të cilët do të angazhoheshin në shkolla për të plotësuar nevojat e kësaj kategorie.
“S’do të ndalem…”
Znj. Nagavci paralajmëroi se nuk do të dorëzohet dhe do të bëjë të pamundurën që të ketë angazhim në shkolla në ndihmë personave me nevoja të veçanta.
“Sado që është dëshëpruese veprimi i kolegëve deputetë e i institucioneve përgjegjëse, kjo nuk duhet të na demotivojë. Përkundrazi, duhet të na mobilizojë për veprim të secilit nga ne për ofrim të mundësive të barabarta për secilin anëtarë të shoqërisë. Përkundër faktit se nuk arrita të kem përkrahjen e shumicës në parlament, unë nuk do të tërhiqem nga kërkesa e drejtë për të angazhuar personelin profesionist në shkolla. Jam e bindur që psikologët, pedagogët, asistentët e fëmijëve me nevoja të vecanta, janë kuadro të domosdoshme për mbarëvajtjen e procesit mësimor dhe për përmirësimin e cilësisë në arsim”, tha deputetja e Vetëvendosjes.
Reagim ndaj saj
Por deputeti i NISMA-s, Zafir Berisha, pjesë e mazhorancës që votoi kundër, nxorri një arsye teknike në lidhje me “Jo”-në.
“Nuk mendoj që një deputet mund të përfolet se është kundër kategorisë për fëmijët me nevoja të veçanta, mirëpo në shumicën e rasteve është praktikuar që kur amendetohen amendamentet, ato të kalojën përmes komisioneve funksionale. Unë edhe në seancë reagova dhe kërkova që të mos luhet me ndjenjat e njerëzve që kanë vuajtje. Nuk duhet me bërë politikë populiste me fatkeqësit e të tjerëve”, tha Berisha për tesheshi.com.
Nëse do të miratohej amendamenti në fjalë, do të kërkohej nga qeveria të ndante 739 mijë e 200 euro për gjithsej 150 punëtorë të tillë.
Nga kjo shifër, 100 psikologë-pedagogë mund të paguheshin me pagën bruto 426 euro, e që shuma vjetore e përgjithshme është 511 mijë e 200 euro.
Në kuadër të saj do të mund të angazhoheshin edhe 50 asistentë të fëmijëve me nevoja të veçanta me pagën bruto 380 euro, e që shuma vjetore e përgjithshme është 228 mijë euro.
Në fund, nuk dihet nëse me aftësi të kufizuara janë vetëm ata, nxënësit-fëmijë, apo dhe politikanët që përgjigjen për fatin e tyre? Të ngjan se më shumë janë këta të dytët! /tesheshi.com/
