Ajax po shkruan sërish historinë duke luajtur sezonin më të mirë që nga mesvitet ’90, ku nën drejtimin e Louis van Gaal fitonte Champions League duke mundur big-ët e Europës, përfshirë dhe Juventusin e madh të asaj kohe.
Këtë sezon, Ajax e synon sërish trofeun e madh, duke befasuar me lojën e saj spektakolare. Hollandezët e rikthyer në famën e dikurshme prishën ëndrrën e Zonjës së Vjetër e Ronaldos, për ta çuar trofeun në Torino.
Por tani që po troket Ramazani, muaji ku muslimanët agjërojnë, Ajax, i cili ka sfidën e ndeshjes së kthimit përballë Tottenhamit, gjendet përballë dilemës nëse duhet t’i lejojë apo jo tre lojtarë të saj që të agjërojnë. Fjala është për Hakim Ziyech, Noussair Mazraoui dhe Zakaria Labyad.
“Ne do t’i lejojmë lojtarët që ata vetë të vendosin nëse do agjërojnë apo jo. Për këtë ata duhet të dakortohen me trajnerin dhe stafin mjekësor”, tha një zyrtar i klubit hollandez.
Raymond Verheijen, një nga trajnerët më të mirë në botë, tha se shpreson që lojtarët të shfrytëzojnë të gjitha të mirat e Islamit, por pa cenuar njëherësh potencialin sportiv.
Megjithatë, kreu i pankinës së Ajax tha se duhet marrë parasysh gjithçka nëse treshja muslimane e ekipit vendos të agjërojë.
“Imagjinoni sikur ndeshja e të mërkurës të shkojë 0-1 për Tottenhamin dhe ata duhet të luajnë kohën shtesë. Mrndoj se duhet të jenë vetëdijshëm se kjo është e pamundur”, tha Raymond Verheijen.
Tashmë, fjala e fundit u takon vetë futbollistëve. Përvojat e deritanishme kanë treguar se edhe pse të agjërueshëm, futbollistë të ndryshëm, në kohë të ndryshme, kanë dhënë maksimumin e potencialit fizik. Ramazani nis të hënën. /tesheshi.com/
