Presidenti Meta nuk u paraqit në komisionin e krijuar enkas për të, pasi sot ishte dhe afati i fundit.
Kjo bëri që nga disa anëtarë të komisionit të shtrohej si alternativë dhe sjellja me forcë në komision.
I kësaj ideje qe Spartak Braho, i cili solli këtë precedent në kujtesë:
“Ky presidenti nuk ka karakter, kjo është themelorja. Më kujtohet kur ky president kur ishte kryeministër e mori më dhunë ‘mister debulesën’ (Berishën). Pse nuk vjen ky sot në parlament, i thirrur? Ai duhet thirrur me dhunë nesër. Kështu që ta votojmë këtë propozim”, argumentoi Braho, një ish-përkrahës i tij dikur.
Ishte anëtarja e komisionit Klodilda Bushka ajo që e hodhi idenë e “marrjes me forcë” të Metës, duke u përkrahur më pas nga Braho.
“Mund të kërkohet ardhja e Presidentit të marrë pjesë në Komisionin Hetimor me forcë. Në Kodin e Procedurës Penale parashikohen mjetet nëse refuzohet ardhja në Komision Hetimor”, tha Bushka.
Më parë, Meta e ka konsideruar komisionin e krijuar rishtaz për shkarkimin e tij si jolegjitim, pasi sipas tij, jolegjitim është dhe parlamenti. /tesheshi.com/
