Kryetarja e Komitetit Kombëtar Republikan (RNC) Ronna McDaniel tha se të gjithë anëtarët e partisë që duan të marrin pjesë në debatet për përzgjedhjen e kandidatit republikan për president në zgjedhjet e vitit 2024, do të duhet të nënshkruajnë një zotim besnikërie.
Sipas saj, të gjithë delegatët që synojnë të marrin pjesë në zgjedhjet paraprake për kandidatët e Partisë Republikane do të duhet të nënshkruajnë një premtim për të mbështetur kandidatin fitues të partisë.
Ronna McDaniel, e cila ka kryesuar RNC-në që nga viti 2017, i tha CNN se të gjithë delegatët duhet të nënshkruajnë një premtim “të verbër” të besnikërisë edhe pse lista përfundimtare e kritereve për debatet nuk është publikuar ende.
“Nëse do të jeni pjesëmarrës në debatin e RNC-së, duke u kërkuar votuesve t’ju mbështesin, atëherë duhet të premtoni gjithashtu se do të mbështesni votuesit dhe këdo që ata zgjedhin si kandidat,” tha ajo.
Në vazhdim të emisionit u publikua një incizim i një interviste me Donald Trump, në të cilën ish-presidenti amerikan tha se nuk ishte i sigurt nëse do ta mbështeste kandidatin eventual republikan nëse nuk do të ishte ai personalisht.
Duke reaguar ndaj kësaj videoje me Trump, Ronna McDaniel tha se ka besim se të gjithë republikanët do të nënshkruajnë Betimin e Besnikërisë.
“Unë kam vërtet besim dhe mendoj se presidenti Trump do të donte të ishte pjesë e debatit”, tha Ronna McDaniel. /tesheshi.com/
