Unioni Botëror i Dijetarëve Muslimanë (IUMS) ka njoftuar se virusi COVID-19 nuk është pengesë për agjërimin, veç rasteve me infeksion.
Një deklaratë nga IUMS shprehet se ata po monitorojnë nga afër të gjitha zhvillimet rreth pandemisë, veçanërisht në prag të ardhjes së Ramazanit.
Duke vënë në dukje se ka pasur disa debate nëse duhet agjëruar apo jo gjatë kësaj pandemie që ka prekur të gjithë botën, Unioni e ka bërë të qartë se koronavirusi nuk është pengesë për agjërimin.
“Agjërimi në muajin Ramazan është një nga rregullat më themelore të Islamit. Agjërimi është një dispozitë e qartë për të gjithë muslimanët e rritur, përveç atyre që lirohen nga ky detyrim për shkak të arsyeve të caktuara siç janë sëmundja, udhëtimi, pleqëria dhe shtatzënia. Gjithashtu, COVID-19 nuk është një arsye e justifikueshme për të mos agjëruar, përjashto ata njerëz që e kanë këtë sëmundje. Kërkimet shkencore dhe mjekësore tregojnë se agjërimi nuk dobëson sistemin imunitar, përkundrazi”, thuhet në deklaratë.
Për më tepër shtohet se muslimanët, në ato vendet ku xhamitë janë mbyllur për shkak të masave kufizuese, duhet t’i kryejnë adhurimet në shtëpitë e tyre.
Ky Union gjithashtu u bëri thirrje vendeve muslimane që të lirojnë të gjithë të burgosurit nën masat pandemike, të arrijnë një marrëveshje dhe t’i japin fund luftërave në muajin e Ramazanit, të heqin bllokadat dhe të lirojnë nga burgu sidomos studiuesit fetarë. Me këtë të fundit është aluduar në Arabinë Saudite. /tesheshi.com/
