Parlamenti ka bërë një lëvizje në boshllëk duke konsumuar raundin e parë të zgjedhjes së Presidentit të ri të Republikës, por pa paraqitur asnjë kandidat.
Kryeministri Edi Rama dhe kryetari i Kuvendit Ilir Meta, deklaruan se kjo ishte një shenjë e sinjal për opozitës që të futet në dialog për zgjedhjet dhe në procesin e zgjedhjes së presidentit të ri.
“Të gjejmë konsensus rreth një figure sa më përfaqësuese. Ne do të presim, më mirë një president i duhur dhe i pranuar”, ka thënë Rama.
Ai ka shtuar se, mazhoranca do të bëjë të gjitha përpjekjet për t’u dhënë shqiptarëve atë që meritojnë.
“Ne duam t’i japim Shqipërisë një president dinjitoz që të qëndrojë mbi palët e të mos jetë i njëanshëm”, ka vijuar Rama.
Ndërsa kryetari i Kuvendit, Ilir Meta ka deklaruar se ezaurimi i raundit të sotëm pa kandidat ishte një tregues i vullnetit për të respektuar procedurat, “por edhe i durimit për të patur mundësinë për të biseduar me opozitën për një proces sa më bashkëpunues e sa më konsensual.
Pasi dihet se kjo mazhorancë i ka numrat për të bërë një zgjedhje të plotë e legjitime të presidentit të ri. Por ky është një proces shumë i rëndësishëm ndaj dhe kërkon pjesëmarrjen edhe të opozitës”.
Meta ka bërë me dije se Konferenca e Kryetarëve ka vendosur që raundi i dytë të jetë ditën e enjte, ndërsa ka shtuar se ekziston koha për të diskutuar këtë çështje në tryezë me opozitën.
“Do ta presim brenda gjithë mundësive tona, por kjo nuk mjafton pasi edhe opozita duhet të vijë. Shpresoj që java e ardhshme të shënojë fillimin e dialogut, gjë kjo e kërkuar edhe nga kryetari i PPE-së”, ka thënë Meta. /tesheshi.com/
