Qeveria turke ka dënuar sjelljen e autoriteteve greke për provokimin e publikut dhe lejimin e djegies së flamurit turk me rastin e rifillimit të ceremonive fetare në xhaminë Hagia Sophia në Stamboll të premten.
“Ne e dënojmë me forcë sjelljen e qeverisë greke dhe zyrtarëve të Parlamentit, të cilët provokuan dhe nxitën publikun me deklarata armiqësore dhe miratuan haptas djegien e flamurit të mrekullueshëm turk në Selanik,” tha zëdhënësi i Ministrisë së Jashtme turke Hami Aksoy në një deklaratë.
Ai tha se Greqia kishte treguar edhe një herë armiqësi ndaj Islamit dhe Turqisë, nën maskën e një reagimi për rihapjen e xhamisë Hagia Sophia për ritet fetare të muslimanëve, raporton Anatolia.
“Asnjë shtet nuk ka të drejtë të mësojë Turqinë se si të përdorin të drejtat sovrane kombëtare. Hagia Sophia, e cila, me vullnetin e popullit turk u rihap për ceremoni fetare, si të gjitha vendet e tjera kulturore dhe historike në Turqi, do të jetë gjithmonë në zotërimin tonë dhe nën mbrojtjen tonë,” tha Aksoy.
Më 10 korrik, autoritetet turke revokuan statusin e muzeut dhe rivendosën statusin e xhamisë Hagia Sophia.
Të premten, namazi i parë i xhumasë, pas 86 vjetësh, u krye në ish-katedralen e famshme të Kostandinopojës, blerë nga sulltan Mehmet Fatihu e dhuruar për t’u përdorur si xhami.
Një vendim i tillë nga autoritetet turke është në përputhje me një marrëveshje me UNESCO, në listën e të cilit Hagia Sophia është një sit i trashëgimisë botërore.
Autoritetet turke kanë njoftuar se, me një frymë tolerance dhe lirie, Hagia Sophia do të mbetet e hapur për vizita te të gjithë njerëzit.
Rifillimi i ceremonive fetare në Hagia Sophia provokoi reagime të ashpra në Greqi, ku këmbanat e kishave ushtuan, e deri dhe flamuj u ulën në gjysmë-shtizë.
Nën këtë frymë, grupe ekstreme të krahut të djathtë protestuan në Selanik të premten mbrëma dhe i vunë flakën flamurit turk. /tesheshi.com/
