Një informacion i publikuar ditë më parë nga Eco Diaro në lidhje me pagat që marrin disa prej lojtarëve që luajnë në kampionatin spanjoll ka ngjallur pakënaqësi te më pak të paguarit.
Në kampin madrilen tashmë ka filluar të shfaqet kjo pakënaqësi lidhur me pabarazinë ekonomike brenda skuadrës, me ç’rast disa futbollistë fitojnë më pak e disa më shumë.
I pari është gardiani Keylor Navas, i cili sipas raportit ndodhet në shkallën e parafundit të listës së pagave. Navas përfiton vetëm 2 milionë euro në sezon, 18 milionë më pak se ylli i skuadrës, Cristiano Ronaldo. Navas ka shkëlqyer këto javë të fundit, me një seri pritjesh të jashtëzakonshme në përballjet e kampionatit spanjoll.
Dani Carvajal është në një situatë të ngjashme. Mbrojtësi i ri spanjoll merr vetëm dy milionë euro në sezon, një shumë shumëfish më e vogël se e bashkëlojtarëve të tjerë.
Isco Alarcon është konsideruar si një prej lojtarëve më premtues të futbollit spanjoll, prandaj Real Madridi e pati peshkuar menjëherë. Por, për çudi, vetëm dy milionë euro është paga vjetore e mesfushorit nga Malaga.
I fundit i kësaj liste të të pakënaqurve është qendërmbrojtësi Raphael Varane, i cili merr 2.5 milionë euro pagë në vit. Shuma që përfiton është shumë pak në krahasim me ofertat që ai ka marrë nga skuadrat e tjera të Europës.
Ndërkohë, Reali i Madridit duhet të fillojë të mendojë për këta lojtarë, e t’i kënaqë financiarisht nëse dëshiron t’i ketë më tutje pjesë të tijën. /tesheshi.com/
