Të enjten mbrëma u “shkrua një histori” në Opinion-in e Feziut; ajo e një ballafaqimi normal me pyetje-përgjigje, ndërmjet analistit Artan Hoxha (ish-ministër demokrat dhe ekspert ekonomie, si dhe ish-presidenti pak orësh i emëruar por i pa votuar) dhe kryeministrit Rama.
Ky i fundit ishte ftuar të zbërthentë planin ekonomik të saposhpallur në kushtet e një krize të pangjashme siç kjo e koronavirusit, duke patur pra si ngacmues një njohës të ekonomisë dhe financave, i njohur dhe si zë opozitar në media por pa angazhim të mirëfilltë politik. Për më pak se një orë, Hoxha pyeste e Rama përgjigjej.
Gjithçka rridhte e qetë, e qartë, e kuptueshme, përshkuar nga etika në komunikim dhe shprehja e dakortësisë aty ku kishte dakortësi. Ishte një performancë mbresëlënëse e të dyve, ku dhe Rama zbuloi që s’ishte fare arrogant, edhe pse përballë kishte një zë eksperti opozitar, u cili tentonte, por jo si qëllim në vetëvete, për t’a shtrydhur mirë e mirë të parin e qeverisë për planin e tij.
Ndërhyrjet e Fevziut herëpashere, në përballjen mes të dyve, ishin diçka e tepërt, për të mos thënë bezdisëse, si një instument i ç’akorduar mes një orkestre në harmoni të plotë.
Pra ndodhi kjo, aspak e tepërt ta quash mrekulli e komunikimit publik, pikërisht në studion ku prej vitesh është hedhur në erë e shndërruar në gërmadhë, çdo kriter etik i këtij komunikimi.
Keqardhëse në këtë rast ishte vetëm pezmi se pse figura si Artan Hoxha nuk bëjnë përçapje të mëtejshme, edhe si projekte politike, së paku për t’i dhënë një fytyrë njerëzore politikës, pa llogaritur aftësinë në shpalosjen e vizioneve ekonomike.
Ndodhi kjo një natë pasi Rama qe i ftuar dhe te Open-i i Eni Vasilit, ku, e cilësuar nga kjo e fundit si arrogant, gati e braktisi emisionin, apo paralajmëroi se nuk do i përgjigjej më herë tjetër. Pse erdhi puna gjer aty, ku u shpalos live një grindje verbale mes tyre? Fakti që Rama po tentonte të zbërthente PPP-të e famshme, e Vasilit kjo i dukej e tepërt.
Ishte i ashtuquajturi analist Robert Rakipllari – për t’u theksuar: analist pa shkrime në 20 vite(?!) – cili kërkoi të dinte, ashtu në mënyrë robotike, thënë ndryshe klisheiste, se përse Rama nuk anullonte PPP-të, një kartë kjo e opozitës në propozimet e saj, si në rastin e tërmetit e si në këtë të koronaviusit. Rama zgjodhi t’i përgjigjet detajisht, duke i marrë të gjitha PPP-të e pretenduara “të oligarkëve” një e nga një, e duke luajtur kartën tjetër: atë të pyetjes drejtuar Rakipllarit për çdo njërën prej tyre se cila nga ato duhet të anullohej sipas mendimit të tij.
Dhe nuk qe një përplasje mes tyre siç e thoshte në një titull TCH. Aspak! Rakipllari, që më krizë ka pyetjet se akuzat që ngre, me një narrativë gazetareske të ngushtuar në 30 fjalë gjithsej, ra brenda në këtë kurthin e Ramës dhe u detyrua të thoshte disa herë “Jo” për anullimet e mundshme që pretendonte.
Së paku, kur është fjala për ekonomi, financë, shifra e kësilloj çështjesh, lëreni Rakipllarin (pa profil specialiteti) e merrni Artan Hoxhën.
Nuk ta fyen inteligjencën dhe nderon opozitarizmin! /tesheshi.com/
