Njeriu që i ka ndryshuar fytyrën Atletikos së Madridit, duke e çuar veç të tjerash dy herë në finalen e Champions League-s gjatë tre sezoneve të fundit, e ka pohuar sot se kontrata e tij do të skadojë në vitin 2018, dy vite më herët nga ç’parashikohej.
“Mund ta pohoj se është e vërtetë,” tha argjentinasi në një konferencë shtypi. “Kemi folur me klubin dhe kemi marrë vendimet më të mira për të dhe për ekipin.”
Por ai ka thënë se asgjë nuk ka ndryshuar në angazhimin e tij ndaj Atletikos së Madridit.
“Nëse jam këtu, është sepse dua të jem këtu. Vendosa që katër vite e gjysmë janë një kohë shumë e gjatë, ngaqë kam nevojë të ndjehem tërë energji në çdo moment me këtë klub,” ka deklaruar Simeone.
“Në çdo rast, unë mund të rinovoj brenda dy viteve nëse klubi mendon gjithashtu se kjo është gjëja e duhur që duhet bërë.”
Ajo që ka ndodhur me Diego Simeone-n nuk është diçka e zakonshme, pasi zakonisht kontratat zgjaten, e nuk shkurtohen.
Kohët e fundit ka patur zëra se destinacioni i tij i ardhshëm është skuadra franceze e PSG-së, por vetë Simeone ka hequr çdo dyshim mbi të ardhmen e tij të afërt, duke këmbëngulur se do të vijojë të drejtojë Atletikon e Madridit. /tesheshi.com/
