Argjentinasi karizmatik, që u pa të shtunën të hidhte një top në fushë në fundin e pjesës së parë, në takimin në “Vicente Calderon” mes Atletikos së Madridit dhe Malagës, është pezulluar për tre ndeshje nga organet kompetente të futbollit spanjoll.
Diego Simeone, trajneri i Atletikos, u detyrua të mos qëndronte në stol në 45 minutat e dyta të atij takimi, pasi u nxor jashtë për veprimin e tij. Vetë ai do ta pranonte dënimin: “Eshtë e qartë se gjyqtari mori vendimin e saktë.”
Ai do ta drejtojë sonte nga stoli Atletikon në gjysmëfinalen e Champions League-s, kundër Bajernit të Mynihut, por nuk do të mundet të bëjë kështu në tre takimet e fundit të kampionatit spanjoll.
Simeone do të jetë në tribunë këtë të shtunë, në sfidën në Madrid mes Atletikos dhe Rajo Valekanos, në transfertën ndaj Levantes më 8 maj, e po ashtu në përballjen e fundit sezonale, më 15 maj, kur ekipi i tij të ndeshet me Selta Vigon në kryeqytet.
Vendimi mund të apelohet brenda 10 ditëve, duke sjellë mbase dhe një ulje të dënimit. /tesheshi.com/
