Pak orë e ndajnë Diego Militon nga mbarimi i karrierës së tij futbollistike. Ish-sulmuesi i Argjentinës, Genoa-s, Real Zaragoza-s dhe Inter-it, do të luajë sonte ndeshjen e tij të fundit.
Pas kthimit nga Europa, Milito i ka kaluar tre sezone te skuadra argjentinase Racing Club, për të cilën ka për të luajtur minutat e mbetura të karrierës.
“Nuk e di si do të reagoj në atë moment,” është shprehur Milito. “Ju kurrë nuk përgatiteni ta lini atë që doni, por unë i kam çuar gjashtë muajt e fundit duke menduar për këtë.”
Ai do të kthehej në vitin 2014 te klubi i rinisë së tij të hershme, Racing Club, pasi kishte shkëlqyer
posaçërisht me Inter-in në fund të viteve 2000.
“Gjithmonë kam dëshiruar të tërhiqem nga futbolli me këtë bluzë. Ndjehem i qetë dhe i lumtur; jam në shtëpi,” janë fjalët e Militos.
Sezoni më i mirë i tij në Europë ishte ai i viteve 2009-2010, ku do të shënonte 30 gola për Inter-in, duke e ndihmuar skuadrën e Milanos të fitonte tripletën. Dy golat e tij në finalen e Champions League-s ndaj gjermanëve të Bayern Munich-ut do t’i jepnin Inter-it trofeun e këtij aktiviteti.
Milito, tanimë 36-vjeçar, do ta bënte debutimin me kombëtaren e Argjentinës në vitin 2003, e do të shënonte katër gola në 25 ndeshje. /tesheshi.com/
