Samiti në Trieste bashkoi vendet e Ballkanit Perëndimor, si dhe udhëheqësit e Gjermanisë, Francës dhe Italisë dhe kryeministrin kroat, Andrej Plenkovic.
Artikulli thekson se BE-ja nuk është në gjendje që të pranojë anëtarët e rinj, dhe prandaj duan të krijojnë një Union Doganor.
“Unioni i planifikuar Doganor ballkanik do të duhej të përbëhet nga Bosnja, Serbia, Kosova, Mali i Zi dhe Maqedonia, pra të gjitha shtetet e formuara pas shpërbërjes së Jugosllavisë, dhe ndoshta edhe Shqipëria, ndërkohë që BE-ja thotë se me krijimin e një hapësire të përbashkët ekonomike këto vende do të bëheshin më të përgatitura për aderimin në BE, kurdo dhe nëse ajo është e gatshme për t’i pranuar ato në shoqërinë e tyre”, shkruan” Die Welt “.
Në të njëjtën kohë, BE-ja dëshiron që të mbajë ndikimin e saj në rajonin, në të cilën po “ballafaqohen fuqitë e mëdha rivale.” Për fat të mirë të Sllovenisë dhe Kroacisë, “ato tashmë janë anëtare të BE-së”.
“Qëllimi i Unionit Doganor është ç’aktivizojë këtë fuçi baruti që quhet Ballkan, por pa i pranuar këtovende në BE”, pasi vendet e Ballkanit Perëndimor në aspektin ekonomik janë të parëndësishme për BE, por në aspektin politik, veçanërisht për ata që e njohin historinë evropiane, kjo pjesë ka një rëndësi kyçe. “Jugosllavia e ka mbajtur këtë miksturë shpërthyese të kombeve stabile, dhe tani kjo është detyrë e Bashkimit Evropian”, shkruan në artikullin e gazetës gjermane, e cila paralajmëron se tensionet në rajon janë në rritje.
Kjo është arsyeja pse BE-ja dëshiron të “ringjallë ish-Jugosllavinë, këtë herë si Union të Doganave dhe Transportit, por pa Kroacinë dhe Slloveninë, të cilat janë tashmë në BE.” Në një konstelacion të tillë, “Serbia do të ishte boshti kryesor, ndërsa të gjitha vendet e tjera do të gravidonin në drejtim të saj”, prandaj nuk është çudi pse Beogradi zyrtar mbështet fuqishëm këtë “ide evropiane, apo thënë më saktë gjermane”.
“Siç Beogradi ka dominuar në Jugosllavi, kështu ai do kishte ndikimin më të madh në Unionin e ri”, thuhet në “Die welt”, dhe shton më tej se edhe Maqedonia “nuk do të kishte më nevojë të frikësohet për mbijetesën e saj, për shkak se ajo do të ishte pjesë e një aleance më të madhe, në vend se të mbetet e vetmuar dhe e pambrojtur, e rrethuar nga fqinjët armiqësorë si: Greqia, Shqipëria, Bullgaria dhe Serbia, të cilat, të gjitha pa përjashtim besojnë se Maqedonia nuk është një shtet i vërtetë, dhe disa nga pjesët e saj u përkasin atyre, dhe që maqedonasit janë një komb i shpikur nga njerëzit “
Përmendet edhe fakti se anketat kanë treguar se vendet e Ballkanit Perëndimor ndjejnë keqardhje për rënien e Jugosllavisë, me përjashtim të Kosovës, dhe gjithashtu vë në dukje se zhdukja e Jugosllavisë ka krijuar një vakuum të pushtetit në Evropë, i cili edhe sot e kësaj dite nuk është plotësuar si duhet.
“Ashtu siç rënia e monarkisë së Habsburgëve bëri Evropën më të dobët dhe ia dorëzoi më vonë Hitlerit shtetet e xhuxhe të sapoformuara, ashtu edhe fundi i Jugosllavisë krijoi një zonë të përhershme konflikti në zemër të Evropës”, në të cilën “lojën e dominimit gjeopolitik e luajnë Rusia, Turqia, SHBA, Gjermania dhe fuqitë e tjera të mëdha”.
Jugosllavia u shpërbë për shkak të “rivalitetit në mes të serbëve dhe kroatëve”, por edhe Unioni i ri ballkanik do të ishte bipolar: nga njëra anë tetë milionë serbë në Serbi dhe Bosnjë e Hercegovinë, dhe në anën tjetër pesë milionë shqiptarë në Shqipëri, Kosovë dhe Maqedoni do të dominonin mbi pjesën tjetër të Unionit.
“Nëse të gjitha këto vende do të krijonin një hapësirë të përbashkët ekonomike, kjo do të lehtësonte pranimin e tyre në BE”, shkruan “Die Welt” dhe kujton se vetë BE-ja ka filluar pak a shumë si një bashkim doganor. “Nga ana tjetër, pjesa më problematike janë marrëdhëniet në mes të Serbisë dhe Kosovës, të cilën ajo e konsideron si pjesë të vet, dhe jo si një shtet i pavarur, dhe në këtë rast do të mund të përsëritej skenari i Qipros”.
“Nga Unioni Doganore Ballkanik më së pakti do të përfitonte Mali i Zi, i cili ka shënuar përparimin më të madh në negociatat e tij për t’u bashkuar me BE-në, andaj qëndrimi i tij në bashkimin doganor të sapoformuar do të nënkuptonte humbjen më të madhe. Për Kosovën kjo ide, pavarësisht dominimit të Beogradit, do të mund të sjellte më së shumti të përfitime, për shkak se ajo është vendi që është më së largëti nga anëtarësimi në BE, andaj për ta ky do të ishte në fakt hapi i parë në këtë drejtim”, përfundon shkrimi. /tesheshi.com/
