Avioni u konsiderua i pasigurt – Incidentet e përsëritura me Boeing në kohët e fundit po shkaktojnë një dhimbje koke për kompaninë
Një e papritur vonoi kthimin e kreut të diplomacisë amerikane, Anthony Blinken, në SHBA nga Zvicra, ku mori pjesë në Forumin Ekonomik Botëror që po mbahet në Davos.
Sekretari amerikan i Shtetit dhe shoqëruesit janë nisur me helikopter nga resorti zviceran. Më pas ata hipën në Boeing 737 të konfiguruar posaçërisht, por u tha se avioni konsiderohej i pasigurt për fluturim për shkak të një rrjedhje oksigjeni, sipas agjencisë së lajmeve Reuters, e cila transmeton informacione nga Bloomberg.
Sipas CNN, ministri i Jashtëm amerikan u detyrua të ndërrojë aeroplan për t’u kthyer në Uashington.
Kjo është goditja e fundit për reputacionin e Boeing. Kujtohet se më 5 janar, një pjesë e avionit u shkëput nga një aeroplan i Alaska Airlines pas ngritjes, ndërsa avioni ishte në 16 mijë këmbë, duke lënë një vrimë të madhe në avion.
Fatmirësisht askush nuk ishte ulur në sediljen ngjitur me vrimën dhe askush nuk u lëndua rëndë. Por incidenti çoi në mosfluturimin e përkohshëm të të gjithë avionëve 737 Max 9 pasi linjat ajrore u urdhëruan t’i inspektonin. Ndërsa shkaku i këtij incidenti është ende nën hetim, CEO i Boeing, Dave Calhoun pranoi se një “gabim” i kompanisë çoi në incident.
Avioni në fjalë i Alaska Airlines është një version më i ri i 737 sesa ai me të cilin ishte planifikuar të fluturonte Blinken, i cili është një model më i vjetër i modifikuar për përdorim nga ushtria. Por versioni më i ri i 737, 737 Max, pati një sërë problemesh serioze shumë kohë përpara incidentit të Alaska Airlines këtë muaj. /tesheshi.com/
