Edhe pse mitingu i fundit i fushatës në Dibër pati si folës numrin dy të LSI-së, Petrit Vasili, i cili, megjithëse mbajti një fjalim të “kursyer”, gjithsesi e mbështeti fort Muharrem Ramën, nga të dyja forcat politike ka vetëm heshtje pas fitores së kandidatit të mazhorancës, që paralajmëron shumë.
Edi Rama u rikthye në Dibër për një tubim të madh në sallën e teatrit të qytetit për fitoren në zgjedhje.
Kryeministri foli gjatë për “Rremin”, siç e quajnë Rremën të ardhurit nga Tirana, dhe për dibranët, por nuk tha asnjë fjalë për aleatët.
Në fjalimin e tij, Edi Rama deklaroi se Muharrem Rama arriti t’i bashkojë votat që i kishin të gjithë kandidatët e pavarur të cilët garuan në kohën e Shukri Xhelilit një vit më parë, por i nxori për të votuar dhe të gjithë ata zgjedhës që nuk e kanë bërë kurrë një gjë të tillë.
Në tubim foli edhe përfaqësuesi i LSI-së, i cili i këndoi Bashës “Hajredin Pashën” në versionin me Lul.
Por nuk e mori fjalën asnjë drejtues lokal i Lëvizjes Socialiste për Integrim. Sipas burimeve nga Dibra, ata nuk ishin të ftuar fare në takim.
Veçse nuk mbaron me kaq. Damian Gjiknuri, i dërguari i Ramës në Dibër, i falënderoi strukturat e PS-së dhe PDIU-së, dhe nuk tha asnjë frazë për “aleatin strategjik”, LSI-në, siç e konsideron kryeministri.
Të vijmë në Tiranë. Për zgjedhjet në Dibër dhanë opinionin e tyre PS-ja, PD-ja, PDIU-ja, e disa politikanë të partive të vogla, por nuk ka folur asnjë fjalë LSI-ja, edhe pse Ilir Meta në intervistën e fundit në Top Story risolli në vëmendje lidhjen e ngushtë me dibranët për shkak të origjinës së bashkëshortes së tij, Monika Kryemadhi.
Ky është sinjali më i pastër që PS-ja nuk e konsideron fitoren e Dibrës të denjë që ta ndajë me aleatin kryesor, dhe LSI-ja nuk e sheh të përshtatshme të bëhet pjesë e një feste ku jo vetëm është e paftuar, por edhe do ta çukisin me kunja dibre.
Nuk është aspak gjë e vogël kjo situatë në dukje lokale, por që i jep dimension kombëtar një qasjeje të re politike, e cila pa dyshim do t’i japë pasojat e veta në ngritjen e strukturës elektorale të vitit 2017.
Ndërkohë që Lulzim Basha ishte në Dibër për fushatë, pikërisht disa orë para votimit, në një festë mundane të Tiranës, në dasmën e djalit të Ylli Ndroqit të Ora News-it, bashëshortja e kreut të opozitës ishte pranë Ilir Metës dhe Monika Kryemadhit.
Një afërsi e vendosur nga organizatorët si “rastësisht”?!
Ndoshta, por në politikën e Tiranës, sidomos kur bëhet fjalë për krerë si Rama, Meta, Basha, Berisha, çdo dalje publike edhe në ambiente private çmohet si sinjal politik.
Meta dhe Basha kanë kryer tre udhëtime bashkë jashtë shtetit, ngjitur në avion, këto kohët e fundit. Rasti më i freskët është kur shkuan në Vatikan.
Kështu që “frika” e Majlinda Bregut se PD-ja po pret t’i shkelë syrin LS-ja nuk është pa bazë. Madje, në kohë të afërt… /tesheshi.com/
