Edi dhe Muharrem Rama kanë arritur një fitore të thellë në Dibër, duke përmbysur disavantazhin e shkaktuar nga videoskandali seksual i Shukri Xhelilit.
Ka përfunduar kështu odiseja gjashtëmujore e bashkisë së Dibrës me rikonfirmimin e mazhorancës, me një thellim edhe më shumë të rezultatit falë kandidaturës së Muharrem Ramës, që ka rezultuar më tepër se efikase.
E majta ka mbajtur sërish Bashkinë e Dibrës, madje me një fitore të thellë. Socialistët kanë filluar festën, duke e konsideruar edhe një triumf politik.
Kandidati i ASHE-së, Muharrem Rama, ka marrë 18602 vota, ose 56.3% të tyre, kurse kandidati i APPD-së, Sherefedin Shehu, ka marrë 14435 vota, ose 43.7%.
Diferenca në vota mes dy kandidatëve është 4167 vota. Pjesëmarrja në votime ishte 58%.
“Kjo është një ditë e madhe për Dibrën, dhe këtë fitore ia kushtoj elektoratit. Do të jetë infrastruktura detyra parësore, që është në gjendje të mjerueshme. Për fitoren ka shumë kontribut Gjiknuri, Blerina Gjylameti, dhe familja ime. Falënderoj popullin dibran për mbështetjen,” tha Rama në prononcimin e parë pas fitores.
Ndërkohë, Damian Gjiknuri, si koordinator në fushatën e Muharrem Ramës, tha se maxhoranca mori besimin e dibranëve.
“Morëm besimin e elektoratit të Dibrës, dhe koalicioni ka qenë pjesë e kësaj fitoreje. Ne ju sollëm një njeri, ata ju sollën një slogan,” deklaroi ai.
Ndërkaq, opozita zyrtarisht nuk ka folur ende, por kreu i saj ka deklaruar se, “politika dhe krimi u bënë bashkë”.
Basha e ka bërë këtë deklaratë në një vizitë në familjen e Azem Hajdarit, në përvjetorin e vrasjes së tij. /tesheshi.com/
