Nga Ylli Pata
“Faktori çam” në Dibër, nga element tribal dhe marrëveshje pragmatiste po kthehet në “letrën e lakmuesit” për aleancën qeveritare Rama-Meta dhe ka të gjitha gjasat për të prodhuar prishjen e martesës së vështirë mes dy liderëve të së majtës.
Eduard Zaloshnja, studiuesi i perceptimit publik, ka qenë aktiv kohët e fundit duke i mëshuar domosdoshmërisë së një koalicioni mes PS-së dhe LSI-së.
Një gjë të tillë bëri edhe dje, duke e konsideruar aleancën e PS-në me PDIU-në si një flluskë sapuni.
Por Zaloshnja ka marrë mallkimin e partisë së Shpëtim Idrizit, e cila në Dibër ka investuar mjaft dhe shpreson të korr një rezultat të lartë.
Në zgjedhjet e vitit 2015, PDIU e Shpëtim Idrizit mori vetëm dy vota më pak sesa LSI-ja e Ilir Metës; dhe nisur nga ky fakt, Edi Rama i dha PDIU-së postin e nënkryetarit të bashkisë që pas largimit të Shukri Xhelilit, mori drejtimin e Dibrës. Fjala është për Et’hem Fidën, bashkëfshatarin e Monika Kryemadhit.
Ndërkaq, PDIU megjithëse është shumë aktive në Dibër me deputetin Aqif Rakipi, në mitingun përmbyllës të fushatës nga ana e koalicionit qeverisës nuk kishte dërguar lidershipin, e as ndonjë deputet, por vetëm kreun e degës.
Mirëpo sondazhet i japin PDIU-së një kuotë të lartë, duke provokuar gjithnjë e më shumë reaksion për faktorin e “çamit-dibran”.
Është ky faktor që i ka dhënë Edi Ramës një adrenalinë politike për të rrezikuar dhe zhytur në një fushatë agresive, kur sondazhet i japin një avantazh kandidatit demokrat Sherefedin Shehu.
Çfarë po nodh realisht?!
Më shumë sesa fitorja e kandidatit, Edi Ramës duket se i intereson të provojë në terren, madje në një terren jashtë influencës çame, se sa mund të ngjisë një koalicion ku Ilir Meta dhe LSI-ja e tij nuk është determinante.
Nëse do të vërtetohet se PDIU arrin të marrë vota mjaftueshëm në Dibër, atëherë Edi Rama do të hedhë në qarkullim edhe Bamir Topin, të cilin e ruan kryesisht për Shqipërinë e Mesme, por edhe në Shkodër e Dibër, ku ish-presidenti i ka mbajtur në “gjumë letargjik” strukturat e saj.
Nëse arrin sukses me këtë aleancë, atëherë Edi Rama do të hapë qeverinë e tij për Shpëtim Idrizin dhe Bamir Topin, duke krijuar kështu një triumvirat politik për zgjedhjet e vitit 2017.
Në zgjedhjet e bashkisë së Tiranës, ku u zgjodh Erjon Veliaj, votat e PDIU-së dhe FRD-së së topit rezultuan të rëndësishme, por gjithsesi LSI-ja nëse votonte kundër mund të komplikonte situatën.
Por sot jemi në një gjendje më ndryshe politike që do të marrë spunto edhe nga reforma në drejtësi dhe arrestimi i “peshqve të mëdhenj” siç kërkoi BE-ja.
Ndaj mund të thuhet se më shumë se fitorja e bashkisë së Dibrës, Edi Ramës, i intereson rezultati i një eksperimenti laboratorik nëse mund të mbijetojë politikisht pa Ilir Metën. /tesheshi.com/
