Shtabi Elektoral i kandidatit të koalicionit “Aleanca për Shqipërinë Europiane”, Muharrem Rama denoncoi atë që e cilësoi presion nga ana e ish-ministrit të Brendshëm, Flamur Noka ndaj punonjësve të administratës në Maqellarë.
Sipas Shtabit Elektoral të Ramës, deputeti i Partisë Demokratike ka intensifikuar veprimet e tij në përpjekje të hapur për të ndikuar në tjetërsimin e vullnetit të lirë të banorëve të njësisë së dytë administrative më të madhe në Bashkinë Dibër.
“Gjatë tre ditëve të fundit, nga ana e zotit Noka është faktuar të jenë kryer telefonata kërcënuese dhe fyese”, thuhet në njoftimin e shtabit elektoral të Ramës, në Dibër. Në të njëjtën deklaratë, bëhet thirrje ndaj organeve të drejtësisë që të veprojnë për të ndaluar tjetërsimin e vullnetit të zgjedhësve më 11 shtator. /tesheshi.com/
