Paolo Dibalës vërtet sikur iu rikthye buzëqeshja pas golit të shënuar ndaj Spalit mbrëmjen e së mërkurës, por ndoshta për këtë ka ndikuar edhe fakti se është bërë më i miri në botë për goditjet e lira.
Sulmuesi i Juventusit, që ka humbur 2 penalltitë e fundit për pasojë të aftësive të portierëve shqiptarë, Berisha e Strakosha, ka gjetur “ngushëllim” tek goditjet e dënimit, të cilat i ka shndërruar gati-gati “në penallti”, për nga lehtësia e shënimit të golit.
Argjentinasi ka shënuar 5 gola me goditje të lira, në sezonin 2016-2017, më tepër se kushdo tjetër në botë, ose të paktën në kampionatet kryesore në të gjithë globin.
Me të majtën e tij që herë kalibrohet mbi murin e lojtarëve kundërshtarë, e herë shkon shigjetë në krah të portierit, duke e hetuar planzhonin e tij, Dibala ia ka kaluar edhe “mjeshtrave” Mesi, Ronaldo, Pjaniç apo Levandovski.
E nëse gëzon ai, gëzon Juventusi, por edhe çdokush që pëlqen goditjet e klasit. /tesheshi.com/
