Nga Mensur Krasniqi
A do kenë drejtë vote diaspora shqiptare në Maqedoni?! Kjo çështje është shndërruar në temë diskutimi menjëherë pasi që deputetët e partisë shqiptare në pushtet, Bashkimit Demokratik për Integrim votuan ndryshimet në Kodin Zgjedhor.
Gjatë gjithë procedurës parlamentare, një kaos i madh mbretëroi në radhët e grupit parlamentar të BDI-së. Fillimisht, në lexim të parë të gjithë deputetët e BDI-së, përpos Artan Grubit, votuan kundër ndryshimeve. E në fund, gjegjësisht pas një ore, ishte deputeti Rafiz Aliti nga radhët e BDI-së që mbeti i vetëm në votën kundër ndryshimeve në Kodin Zgjedhor, ndërsa të gjithë deputetët tjerë votuan pro.
Kështu, me 92 vota për, 3 kundër dhe vetëm 1 i përmbajtur, Kuvendi i Maqedonisë dje në mesnatë votoi ndryshimet në Kodin Zgjedhor, me ç’rast 39.502 mërgimtarë, prej të cilëve afro 30 mijë janë që vijnë nga njësia numër gjashtë ku përfshihen kryesisht votuesit shqiptarë, rrezikojnë të fshihen nga listat e votimit nëse brenda një periudhe të shkurtër kohore(ende e papërcaktuar) nuk paraqiten në institucionet përkatëse për ta rikonfirmuar se janë pjesë përbërëse e shoqërisë në Maqedoni.
Kjo për deputetin e BDI-së, Rafiz Aliti i cili i vetëm kundërshtoi bashkëpartiakët e tij paraqet një krim, dhe sipas tij lista prej 39.502 votues ka prapavijë politike, partiake, por edhe etnike.\
Edhe analisti politik Abdylvehab Ejupi, sa i përket ndryshimit të Kodit Zgjedhor ripërsëriti qëndrimin e Alitit, mirëpo duke e potencuar dhe precizuar se ky krim i BDI-së ka dëmtuar shqiptarët dhe se me këtë lëshim sipas tij, për të satën herë vërtetohet se nuk përfaqëson interesat e shqiptarëve, e madje shumë më tepër, është parti antishqiptare.
“Mbështetja e ndryshimit të Kodit zgjedhor nga ana e BDI-së, që sipas vlerësimit të vetë deputetit të tyre Rafiz Aliti, kjo është krim ndaj shqiptarëve. Për më tepër marrja e të drejtës fundamentale të votës mërgatës shqiptare, e cila me kontributin nëpërmjet remitencave vjetore dhe investimeve është promotori dhe elementi që mban gjallë Maqedoninë, kjo atëherë kalon në akt krimi kundër shqiptarëve. Gjithashtu edhe sipas Todorovit që u shpreh qartë se ata 39.500 votues që do të “pastrohen” kryesisht janë të njësis zgjedhore nr.6, e si rrjedhojë shumica shqiptare me këtë akt, ashtu siç tanimë të gjithë ishim dëshmitar edhe nga bombat e Zaevit, e edhe nga bisedimet dhe konkluzat turpëruese nga Perzhino 1 dhe 2, për të satën herë vërtetohet se BDI tashmë nuk përfaqëson shqiptarët, bile nëse më lejohet të shkoj edhe një hap më tutje dhe të them që është parti anti-shqiptare. Këtë, me siguri që populli nga këta politikanë llogari dhe përgjegjësi kërkon, ndërsa në zgjedhje rëndë do të duhet ti ndëshkon”, deklaroi për tesheshi.com, analisti politik Abdylvehab Ejupi.
Ndërsa sipas analistit tjetër politik, Selim Ibrahimi me fshirjen eventuale të diasporës nga sistemi statistikor i Maqedonisë, respektivisht nga lista e votuesve, partitë shqiptare në pushtet rrezikojnë të kthehen në humbës të vërtetë nga marrëveshja për ndryshim të Kodit Zgjedhor.
“Këtu kemi disa çështje të pazgjidhura. Pra regjistrimi i popullësisë brenda dhe jashtë vendit. Nëse nuk kemi një numër të saktë të diasporës e cila që më parë është fshirë nga sistemi statistikor i Maqedonisë atëhërë rrjedhimisht se çfarë do Kodi zgjedhor të sillej nuk do të sillte rezultate konkrete dhe ligji nuk do ta kryente funksionin e vet. Kështu duhet parë deri në fund të gushtit se si do të veprojnë partitë shqiptare për sa i përket diasporës. Me humbjen eventuale të diasporës, pra refuzimi për të ushtruar të drejtën qytetare, partitë shqiptare rrezikojnë të kthehen në humbës të vërtetë. Nëse nuk gjendet formë tjetër se si do të votojë diaspora, dhe si do të bëhët pastrimi i listës, ka mundësi që shumë votuesëve t’ju mohohet e drejta ligjore. Ekzaminimi krahasues dhe i drejtpërdrejt besoj se është modeli për të mbrojtur diasporën shqiptare nga liderët e tyre”, ka thënë për portalin tesheshi.com, analisti politik Selim Ibrahimi. /tesheshi.com/
