Komuniteti shqiptaro-amerikan në Çikago fton Shqipërinë dhe Kosovën të dalin në mbështetje të shqiptarëve në Maqedoni për të siguruar zbatimin e platformës. Komuniteti përmes një deklarate ofron edhe kontributin e tij në këtë drejtim.
“Presidenca e komunitetit shqiptaro-amerikan vendosi njëzëri për të mbështetur deklaratën e përbashkët të partive shqiptare në Maqedoni, e njohur si platforma shqiptare. Ne mirëpresim unifikimin e faktorit politik shqiptar në Maqedoni dhe angazhimin kushtetues të dy shteteve shqiptare në Ballkan, në këtë moment të vërtetë dhe delikat për të dhënë një kontribut të rëndësishëm historik në zgjidhjen e çështjes shqiptare në Maqedoni “, thuhet në deklaratë.
Komuniteti shqiptaro-amerikan jo vetëm mbështet platformën shqiptare por edhe këmbëngul në zbatimin e plotë të pikave të platformës.
Komuniteti shqiptar në Çikago thotë se prej një kohe të gjatë kanë marrëdhënie të shkëlqyera me administratën amerikane, që kanë mbështetur politikisht dhe financiarisht luftën në Kosovë dhe atë në Maqedoni në vitin 2001.
Prandaj, komuniteti shqiptar në SHBA deklaron se do të aktivizojë të gjithë mekanizmat e tij që të ofrojnë mbështetje për kërkesat e shqiptarëve në Maqedoni. /tesheshi.com/
