Vazhdojnë reagimet e shoqërisë civile e organizatave të ndryshme për krizën politike në Kosovë që nuk po gjen fund.
Forca e Diasporës për Atdheun (FDA) bën apel tek të gjitha subjektet politike në Kosovë që t’i lënë anash siç thotë interesat individuale e klanore dhe të këndellen duke u ulur në tryezë për gjetjen e zgjidhjeve politike në të mirën e vendit.
FDA e quan të papranueshëm faktin se po bëhen dy vite të bllokadave inatçore të cilat nuk sollën asnjë dobi për vendin, por përkundrazi, stagnim e kthim mbrapa.
“Përderisa klane të caktuara politike kalkulojnë për interesat e pushtetit qytetarët e vendit vazhdojnë të thellohen në varfëri. Të gjitha subjektet politike, pa përjashtim, kanë harruar misionit për të cilin janë të thirrura, duke u vënë në shërbim të agjendave pushtetmbajtëse respektivisht pushtetmarrje duke mos zgjedhur as mjete qoftë edhe ato të kundërligjshme”, thuhet në deklaratën e kësaj organizate.
FDA më tej thotë se mirëqenia e qytetarëve duhet të kthehet urgjentisht në agjendat e politikës kosovare.
“Në këtë kontekst, kërkohet seriozitet dhe bashkëpunim i të gjithë aktorëve, duke kërkuar zgjidhje politike në mënyrë të civilizuar dhe demokratike. Njëherësh, u bëjmë thirrje për konsensus dhe bashkëpunim të plotë, kur janë në pyetje temat me interes nacional. Të krijohen grupe serioze ekspertesh të cilat mund dhe dinë të ulen në tavolinat e bisedimeve dhe të heqin dorë nga përfaqësimi militantesk, i cili po i shkakton dëme të pariparueshme vendit.
Kriza politike në Kosovë ka hyrë në muajin e pestë të saj dhe as pozita e as opozita nuk po luajnë nga qëndrimet, derisa këtë kokëfortësi të tyre më së shumti po e paguan qytetari i varfër kosovar. /tesheshi.com/
