Nga Blendi Gashi
Që nga takimi i fundit që u mbajt mes presidentëve Thaçi dhe Vuçiç më 31 gusht, një takim i radhës nuk është bërë i ditur ende se kur mund të mbahet.
Megjithatë, nëse Thaçi merr rrugë sërish pa lejen e organeve ligjvënëse, ndryshe n’kokë t’vet, e vazhdon bisedimet me Serbinë, atij shumë shpejt mund t’i dalë përballë kryeministri Haradinaj dhe kështu të nis një luftë e re në heshtje mes tyre se si duhet të vazhdohet ky proces i cili nga fillimi më 19 prill të 2013-tës nuk ka pasur transparencë të plotë.
Papritmas për procesin e dialogut dhe rrjedhën e tij, Haradinaj ka folur në seancën e së mërkurës duke deklaruar se së shpejti do të raportojë për gjendjen e dialogut dhe do të propozojnë një plan si të vazhdohet tutje; e nënkuptuar kjo si një paralajmërim për Thaçin se nuk mund të dialogojë n’kokë t’vet.
“Ne kemi bërë kujdes të madh për ta kuptuar gjendjen rreth dialogut. Në një afat të caktuar kohor do të raportojmë mbi gjendjen. Kemi parapa që të propozojmë një plan për pozicionin e Kosovës mbi të gjitha këto tema. Jemi të hapur të diskutojmë edhe me presidentin, por duhet të sjellët në Parlament. Nuk po diskutoj për afate, por në një afat të caktuar kohor do të diskutohen të gjitha këto”, tha Haradinaj.
Megjithatë ai nuk dha detaje se çfarë përmban saktësisht plani i tij për dialogun me Serbinë, nëse edhe ai do përfshihet në këtë proces apo jo, apo do të kërkojë që edhe opozita të jetë pjesë e dialogut. Po ashtu nuk tregoi se ç’tema parasheh plani i tij për diskutim me palën serbe, kur do të diskutojë me Thaçin, sikur që nuk dha një afat kohorë për të gjitha këto.
Por padyshim që kjo deklaratë e Haradinajt do vë në lëvizje Thaçin dhe mbetet të shihet në ditët apo javët në vazhdim nëse dy liderët do dakordohen si do ecet më tutje me bisedimet me Serbinë, apo Thaçi fare nuk do i vë veshin fjalëve të Haradinajt dhe do ec tutje me ekipin e tij duke vazhduar takimet me Serbinë, pa marrë leje nga Kuvendi dhe pa i raportuar ligjvënësve.
Shkuarjen n’kokë t’vet të Thaçit në takim me Vuçiçin, e kanë kundërshtuar në vazhdimësi partitë tashmë opozitare si VV e LDK, të cilat në të njëjtën kohë kanë kundërshtuar edhe idenë e presidentit për formimin e të ashtuquajtur “Grupi të Unitetit” për vazhdimin e bisedimeve.
Kujtojmë se marrëveshja e parë mes Kosovës e Serbisë u nënshkrua në Bruksel me 19 prill të 2013-tës, ku pikërisht Thaçi, atëherë kryeministër, dhe Ivica Daçiq kryeministër i Serbisë, hodhën firmën në marrëveshjen 15 pikëshe, me qëllim të normalizimit të marrëdhënieve mes të dy vendeve.
Marrëveshja e 19 prillit, ndër të tjera përmban pika që flasin për Asociacionin e Komunave me Shumicë Serbe dhe shpërbërjen e strukturave paralele në veri. /tesheshi.com/
