Vazhdimi i dialogut me Serbinë mbetet një prej obligimeve që qeveria e re kosovare pretendon ta ketë në fillim të mandatit të saj. Për këtë çështje ndërkombëtarët janë të pakompromis të cilët thonë se dialogu duhet të vazhdojë, për çka është “pro” edhe politika kosovare, por duan riformatim.
Ramush Haradinaj, kandidat për kryeministër nga koalicioni PDK-AAK-NISMA, kërkon që në dialog të përfshihet edhe Amerika, ndërsa premton se për çështje të brendshme nuk do ta bëjë një gjë të tillë.
“Dialogu është instrument për çështje mes fqinjësh, por nuk do të pranojmë dialog të pabarabartë, pa reciprocitet. Nuk mund të diskutohen temat e brendshme të Kosovës në dialog me Serbinë. “Unë nuk mund të vrapoj pas dikujt, vetëm pse fton në dialog, pa e ditur se cka thonë qytetarët, shoqëria civile, pra vendi në tërësi. Europa nuk mundet ta zgjidhë asnjë problem vet. Pa u përfshirë Amerika, nuk ka asnjë mundësi. Duhet të kthehet Amerika në dialogun mes Kosovës dhe Serbisë”, ka deklaruar Haradinaj, në një intervistë për “Klan Kosova”.
Kujtojmë se dialogu me Serbinë u ndërpre muaj me parë me një vendim të Kuvendit pas mbajtjes “peng” të Haradinajt për disa muaj në Francë me një fletëarrest nga Serbia. /tesheshi.com/
