Nga Blendi Gashi
Ka shkuar huq thirrja e presidentit Thaçi që drejtuesit e partive të ulen në një tryezë dhe të dakordohen për ekipin negociator për bisedimet me Serbinë.
I ashtuquajturi “takim i liderëve”, i organizuar nga Grupi për Hulumtim të Politikave në Ballkan (BPRG) dështoi qysh në fillim pasi nga kryetarët e partive parlamentare pjesë në takim mori vetëm Shpend Ahmeti kryetar i Partisë Socialdemokrate, ndërsa partitë tjera janë përfaqësuar me nënkryetarë.
Se takimi do të dështoi e tregoi më pas bojkoti i Vetëvendosjes dhe pjesërisht i LDK-së.
Kjo e fundit u përfaqësua nga nënkryetari Lutfi Haziri i cili doli nga tryeza vetëm pas pak minutash me arsyetimin se për dialogun duhet të diskutohet veç në Kuvend.
Ndërsa Vetëvendosje që ishte pjesëmarrëse në takimet e organizuara nga partitë përmes një njoftimi tha se “Kuvendi i Kosovës duhet t’ia tregojë vijat e kuqe Presidentit Thaçi dhe Serbisë”.
Përveç Thaçit që mund të jetë zhgënjyer me dështimin e këtij takimi, pasi thirrja e tij nuk shkoi në vend për bërjen e ekipit negociator që e kërkon prej kohësh, tejet i mllefosur me rrjedhën e tryezës u shpreh kryetari i Partisë Socialdemokrate, Shpend Ahmeti.
Ai hapur shprehu nervozizmin si kryetarët e partive tjera nuk morën pjesë në takim, për çka la të hapur mundësinë se takimet e radhës do t’i bojkotoi.
“Që në fillim ky tentim dështoi ngase nuk morën pjesë as kryetarët e PDK-së, AAK-së dhe dalja e LDK-së nga tryeza. Qëndrimet e qeverisë dhe koalicionit janë shumë të largëta për këtë koncensus”, tha Ahmeti.
Përkundër dështimit të këtij takimi dhe takimeve tjera të organizuara nga partitë politike, këto të fundit sërish kanë paralajmëruar se do të vazhdojnë me një rund të ri të organizimit të tryezave.
Partia e kryeministrit Ramush Haradinaj, AAK-ja, po bëhet gati ta organizojë tryezën e radhës ku epilogu pritet të jetë i njëjti, pa arritjen e asnjë kompromisi pasi që opozita nuk e do Thaçin kryenegociator, ndërsa partitë në pushtet janë pro, përveç NISMA-s së Fatmir Limajt. /tesheshi.com/
