Kur çdo ditë e më shumë po flitet për rinisjen e dialogut mes Kosovës e Serbisë për arritjen e një marrëveshje finale, kryevetëvendosësi Albin Kurti thotë se është e domosdoshme së parti të bëhet bilanci i dialogut 2011-2018, të raportohet në Kuvend dhe të bëhet një debat parlamentar për gjithë çfarë ka ndodhur deri më tani me këtë proces.
Sipas tij ka pasur shumë investime, pak kthim dhe pak transparencë në këtë proces.
“33 marrëveshje janë nënshkruar në dialogun 6 vjeçar, shumica e tyre nuk janë realizuar në veçanti duhet cekur bllokimin që iu bë Kosovës në fushën e energjisë elektrike, në urën në Mitrovicë, në integrimet dhe në njohjen e diplomave”, deklaroi Kurti në një konferencë për media.
Ai gjithashtu tha se janë disa pika të cilat duhet vendosur e që kanë të bëjnë me dialogun.
“Të realizohet dialogu i brendshëm dhe demokratik. Debate në Kuvend për dialogun, për qëllimin dhe formatin. Dialogu që u zhvillua në vitet 2011-2017, ishte dialog sipas kushteve të Serbisë, diskutohej për çështje të brendshme të Kosovës, pa u konsideruar Serbia si borxhli ndaj Kosovës dhe shqitparëve.
Të zhvillohet një dialog me BE-së prë dialogun me Serbinë, për natyrën, qëllimin dhe përmbajtjen e atij dialogu. Nuk mund të vazhdohet me dykuptimësinë, pra ka së paku tri kuptime të ndryshme. Duhen sqaruar shprehjet edhe objektivat si dhe përfitimet e Kosovës në procesin euroatlantik.
Të pajtohemi që të mos ketë asnjë shmangie në Kosovë nga prioritizimi i punësimit dhe drejtësisë si dhe nga dialogu me serbët e Kosovës dhe pakicat e tjera për zhvillim”, tha ndër të tjera Kurti. /tesheshi.com/
