Nga Blendi Gashi
Kryeministri i Kosovës, Isa Mustafa është kujtuar më së fundi që të çështjen delikate të Demarkacionit ta shtrojë në debat edhe me opozitën.
Ai ka paralajmëruar se së shpejti do t’iu bëj ftesë partive opozitare dhe Listës Serbe që të ulen në një tryezë për të debatuar pra mbi ndarjen e vijës kufitare me Malin e Zi, që së fundi është për shkak për krizën e radhës në politikën e Prishtinës.
Kështu, Mustafa në ditët në vijim do të mundohet të bëj atë që ditë më parë dështoi ta bëjë deputeti i pavarur, Ramiz Kelmendi, i cili nuk arriti t’i mbledhë krerët e partive në vilën e tij një ditë para seancës së 1 shtatorit, ku pikë e rendit ditës ishte ratifikimi i marrëveshjes në fjalë; e që u tërhoq me kërkesë të kryeministrit, me gjasë për shkak të mungesave të votave.
Kreu i ekzekutivit kosovar ka paralajmëruar se nisja e bisedimeve do të ndodhë pak ditë para risjelljes në Kuvend të projektligjit, por se kur, në ç’ditë, nuk ka sqaruar.
Por ndërsa ka ftuar rivalët në debat, Mustafa në të njëjtën kohë me deklarimin e tij se “s’do të pranojë kushte as nga Lista Serbe e as nga të tjerët”, ka mbyllur dyert për komunikim, sepse deklarata e tij nënkupton se qeveria nuk lëviz nga qëndrimet dhe se shteti nuk humbet tokë.
Por si komentojnë përfaqsuesit opozitarë këtë ftesë politike me një kusht të tillë paradoksal, ku i parambyllet dera çdo ankese?
Ata paralajmërojnë se nëse kryeministri Mustafa nuk pranon paraprakisht se versioni aktual i demarkimit të kufirit me Malin e Zi është gabim, atëherë thirrja e takimit për debat pozitë-opozitë është e panevojshme, dhe për më tepër vetëm se ngre tensionet.
Fillimisht, zëdhënësi i AAK-së, Muharrem Nitaj, thotë se është për keqardhje që kryeministri i vendit, merr një nismë për ta takuar opozitën për Demarkacionin, me kaq vonesë, sidomos pas shumë përplasjesh për këtë çështje, por sipas tij më mirë vonë se kurrë. E më pas, Nitaj thotë se AAK ende nuk ka marrë një ftesë të tillë dhe nuk e di se cila është ideja e kryeministrit dhe se çka provohet të arrihet me një takim të tillë.
“Nëse Kryeministri Mustafa, e ka parë qe ky version i demarkacionit ka gabime serioze dhe qëllimi i tij është që të bëhën korrigjimet e domosdoshme, atëherë një nismë e tillë, ka kuptim dhe unë besoj se do të pranohet.
Në çdo variant tjeter, takimi s’ka kuptim dhe vetēm mund t’i komplikojë gjërat edhe më shumë.
AAK-ja është e përcaktuar dhe ka vullnet për t’i dhënë zgjidhje kësaj çështjeje. Kërkon që pikat kontestuese të versionit aktual të kthehen në Çakorr dhe në Kullë dhe sido e kurdo që arrihet kjo, ne këtë çështje e konsiderojmë të mbyllur.
Për këtë qëllim jemi të gatshëm të takohemi në çfarëdo formati dhe në çdo kohë!”, thotë Nitaj.
Nga ana tjetër, deputeti i partisë, NISMA për Kosovën, Enver Hoti, takimin e thirrur nga Isa Mustafa për Demarkacionin e quan një kërkesë shteprë, sa për sy e faqe, dhe një takim që nuk mund të prodhoj rezultat.
“Nuk mund të them saktë nëse NISMA do të pranoj apo jo ftesën për takim, por mendoj se ky takim nuk mund të prodhoj asnjë rezultat, vetëm sa të komplikoj edhe më shumë gjërat.
Kërkesa e NISMA-s por mendoj edhe e opozitës në përgjithësi është që marrëveshja e Demaracionit duhet të rishqyrtohet nga fillimi”, thotë Hoti, për tesheshi.com .
Vetëvendosje nuk deklarohet
Portali tesheshi.com ka kontaktuar edhe me përfaqësues të Lëvizjes Vetëvendosje, por ata nuk janë shprehur të gatshëm të deklarohen për çështjen në fjalë.
Driton Çaushi, deputet i VV-së tha për tesheshi.com se nuk mund të jap një qëndrim pasi vetëm sa i ka skaduar masa e “arrestit shtëpiak” dhe nuk është në dijeni nëse lëvizja ka marrë ndonjë qëndrim lidhur me deklarimin e Mustafës për të debatuar për Demarkacionin.
Edhe zyrtarja për media në VV, Tinka Kurti, tha për tesheshi.com se lëvizja nuk ka ende ndonjë qëndrim, andaj edhe nuk mund të deklarohet për temën në fjalë.
Së fundi, kryeministri Mustafa para kabinetit qeveritar ripërsëriti kërkesën për debat, derisa shtoi se ka pasur presione dhe kërcënime te deputetët për Demarkacionin. Por ai nuk e përmendi asnjë emër për të faktuar se cili prej deputetëve është kërcënuar dhe nga kush. /tesheshi.com/
