Presidenti Thaçi u “vetëkonfirmua” si njeriu i amerikanëve, pasi në një deklaratë të fundit në lidhje me rinisjen e dialogut nën hyqmin europian, tha se pa SHBA zorr se mund të vijë njohja reciproke, e cila është dhe kauza bazë e Prishtinës përballë Beogradit.
“E ritheksoj dhe jam i bindur se pavarësisht se ku ndodh dialogu, në këtë apo atë qytet, aty ku nuk janë Shtetet e Bashkuara të Amerikës, jam skeptik që mund të ndodhë njohja reciproke apo e di saktësisht që nuk ndodhë, prandaj jetike për ne është që në tavolinë dhe në procesin e dialogut të jetë SHBA-ja”, theksoi Thaçi.
Deklarata e tij u bë pas një takimi në Presidencë me kryeministrin Hoti, për të diskutuar mbi të pikërisht për llojin e dialogut që sapo ka nisur, i cili ka ngjallur debat mbi atë nëse është politik apo teknik.
“Duhet të kemi një pikë të diskutimit dhe pastaj vijnë çështjet tjera dhe duhet të sqarojmë raportin mes shtetit të Kosovës dhe Serbisë. Sepse raporti i Kosovës dhe Serbisë është kryekëput politik dhe jo teknik”, u shpreh Thaçi.
Nga ana tjetër, Hoti deklaroi se “nuk është proces që kryhet nga një person i vetëm dhe prapa perdeve. Nuk ka asgjë që nuk duhet ta dijë publiku ose qytetarët. Fokusi jonë është marrëveshja përfundimtare me njohje reciproke”.
“Do t’i mbaj të gjitha palët plotësisht të informuara për dialogun”, theksoi kreu i qeverisë së Kosovës.
Kujtojmë se Hoti u gjend në krye të Dialogut nga një rrethanë krej e pazakontë, si pasojë e një përplasjeje të kamufluar SHBA-BE. Kur Uashingtoni po përgatiste takimin Thaçi-Vuçiç, në shpërfillje të plotë ndaj Brukselit, erdhi befas një lëvizje nga Gjykata Speciale në Hagë, e cila publikoi një aktaktuzë për Thaçin.
Kjo bëri që Thaçi të vetëlargohej nga Dialogu, ndërsa ky i fundit kaloi nga duart e amerikanëve në ato të europianëve. /tesheshi.com/
