Mesfushori i avancuar i PSG-së, Di Maria është në telashe. Argjentinasi ka marrë një ndëshkim me 1 vit burg nga autoritetet spanjolle të drejtësisë, për shkak se në periudhën kur luante me Realin e Madridit, rezultoi se nuk kishte deklaruar 1.3 milion euro.
Fushata kundër evazionit fiskal që është përhapur masivisht tek klubet e futbollit në Spanjë, nuk ka kursyer edhe 28-vjeçarin, pavarësisht përshtypjes së shkëlqyer që ai bëri tek Los Blancos, me të cilët fitoi edhe disa kupa.
Ndaj, organet e hetimit kanë kërkuar zbatimin rigoroz të ligjit, çka ka bërë që Di Maria të dënohet me 1 vit heqje lirie, ose ta konvertojë këtë dënim me një gjobë prej rreth 2 milion eurosh.
Eshtë pikërisht kjo masë disiplinore si më e mundshmja të ndodhë, pasi argjentinasi që është bërë edhe pjesë e rregullt e kombëtares çeleste, nuk mund të largohet nga fushat e lojës tashmë që është në vitet më të mira të karrierës së tij. /tesheshi.com/
