Mirëserdhe Di Maria! Kështu është shkruar në Twitter-in e klubit të Barcelonës mëngjesin e së mërkurës, lajm që ka krijuar diku habi, diku entuziazëm e diku kundërshti.
Por gjithçka ka qenë fallco, pasi një hacker ka hyrë në faqen e klubit dhe mbase ka shprehur një dëshirë të tij, duke bërë fakt të kryer blerjen e argjentinasit Di Maria nga PSG.
Por hackerimi i faqes së Barcelonës, mund të jetë edhe një “indikator” për drejtuesit blaugrana, pasi ata prej ditësh janë në bisedime me Di Marian, të cilin e shohin si alternativën e parë pas Kutinjos së Liverpol, por edhe si emër në listën e dëshirave të Lionel Messit.
Madje mediat pranë klubit katalan, e japin fakt të kryer ardhjen e mëngjarashit argjentinas, duke parë se Liverpol “nuk ha pykë” që të shesë brazilianin Kutinjo as për 135 milion euro.
E meqë jemi në merkaton e Barcelonës, njoftimet e fundit, e konsiderojnë të mbyllur pozitivisht blerjen e Dembelesë nga Dordmund, si edhe largimin e alternativës Sari, për të cilin vetëm sa u kontaktua skuadra ku ai luan, Nica.
Mbase lajmi i rremë i hacker-uesit, ka shërbyer si ogur i mirë që Barcelona të realizojë 2-3 top blerje, në mënyrë që të kthehet pretendente për të fituar gjithçka, gjë që nuk është parë në këtë çelje të sezonit të ri futbollistik. /tesheshi.com/
