Nga Blendi Gashi
Politikanët kosovarë dhe institucionet që ato drejtojnë, brenda vitit marrin jo pak dhurata, por shumica prej tyre nuk i deklarojnë ato.
Me Ligjin për deklarimin, prejardhjen dhe kontrollin e pasurisë së zyrtarëve të lartë publikë dhe deklarimin, konkretisht kreu 3, Neni 11 thotë se “zyrtarët e lartë publikë kanë obligim që të evidentojnë të gjitha dhuratat që pranojnë”. Por ky ligj nuk respektohet nga shumica e institucioneve edhe pse obligohen që më së largu më 31 mars të çdo viti të paraqesin listën e dhuratave të tyre nga viti paraprak.
Përmes këtij shkrimi portali ynë do të tregojë se cilat institucionet kanë pranuar dhurata më shumë nga viti 2014 deri më 2017, gjithnjë duke ju referuar deklarimeve që kanë bërë institucionet në Agjencinë Antikorrupsion, ndërsa nuk dihet saktësisht se ç’dhurata kanë pranuar pasi nuk jepen detaje të hollësishme.
Nga viti 2014 deri më 2016 kampion në pranimin e dhuratave është Presidenca, kurse më 2017-të fronin e merr Zyra e Kryeministrit.
\Zyra e kryeministrit pranoi 32 dhurata më 2017-tën
Në vitin 2017-të, vetëm 7 institucione kanë deklaruar të kenë pranuar gjithsejtë 88 dhurata, kurse 21 jo. Të gjitha dhuratat janë protokollare dhe asnjë e rastit.
Kampion për marrjen e dhuratave këtë vit është Zyra e Kryeministrit me gjithsejtë 32 dhurata; pastaj Universiteti “Ukshin Hoti” në Prizren me 26 dhurata, e treta renditet Presidenca e drejtuar nga Hashim Thaçi me gjithsejtë 10 dhurata, pastaj Kuvendi i Kosovës me 6 dhurata; Gjykata Kushtetuese 3 dhurata dhe Fondi për Sigurimin e Depozitave në Kosovë 1 dhuratë.
Më 2016-të, 77 dhurata institucioneve
Në vitin 2016-të 9 institucione kanë deklaruar se kanë pranuar gjithësejt 77 dhurata prej tyre 11 të rastit, ndërsa 27 institucione nuk kanë deklaruar se kanë pranuar dhurata.
Këtë vit prinë Presidenca me 20 dhurata ( 17 protokollare dhe 3 të rastit), pastaj Kuvendi i Kosovës 16 (15 protokollare dhe 1 e rastit), Zyra e Kryeministrit 14 ( 12 protokollare dhe 2 të rastit), Zyra e Rregullatorit për Energji 12 ( 8 protokollare dhe 4 të rastit), Ministria e Financave 9 protokollare, Ministria e Punëve të Jashtme 2 protokollare, Prokuroria e Shtetit 1 e rastit, Fondi për Sigurimin e Depozitave në Kosovë 1 protokollare, Komuna e Graçanicës 1 protokollare dhe Agjencia kundër Korrupsionit 1 dhuratë protokollare.
Auditi 14 dhurata të rastit të pranuara më 2015-të
Në vitin 2015-të kanë deklaruar 12 institucione të kenë marrë 126 dhurata prej tyre 35 janë të rastit, kurse 36 institucione nuk kanë marrë dhurata.
Edhe këtë vit prinë Presidenca me 30 dhurata (26 protokollare dhe 4 të rastit), pastaj Kuvendi i Kosovës 25 protokollare, Ministria e Integrimeve Evropiane 16 (12 të rastit dhe 2 protokollare), Zyra e Kryeministrit me 14 (11 protokollare dhe 5 të rastit) Zyra e Auditorit të Përgjithshëm 14 dhurata (të gjitha janë të rastit), Prokuroria e Shtetit 10 protokollare, Zyra e Prokurorit Disiplinor 5 protokollare, Gjykata Kushtetuese 4 protokollare, Ministria e Bujqësisë, Pylltarisë dhe Zhvillimit Rural 3 protokollare, Këshilli Kombëtar për Trashëgimi Kulturore 3 protokollare dhe policia e Kosovës 2 dhurata protokollare.
Më 2014-të Presidenca 103 dhurata të pranuara
Në vitin 2014-të, 10 institucione kanë deklaruar se kanë pranuar gjithësejt 192 dhurata, ku 99 janë të rastit, ndërsa 28 institucione s’kanë deklaruar të kenë marrë dhurata.
Presidenca prinë me 103 dhurata (38 protokollare dhe 65 të rastit), Zyra e Kryeministrit 28 (24 protokollare 4 të rastit), Zyra e Rregullatorit për Energji 14 dhurata të rastit, Ministria e Integrimeve Evropiane 10 dhurata të rasti, Këshilli Prokurorial i Kosovës 10 dhurata protokollare, Kuvendi i Kosovës 10 dhurata ( 9 protokollare 1 e rastit), Komuna e Mamushës 9 dhurata protokollare, Këshilli Gjyqësor i Kosovës 5 (1 protokollare 4 të rastit), Komuna e Parteshit 2 dhurata protokollare dhe Ministria e Administrimit të Pushtetit Lokal 1 dhuratë të rasti. /tesheshi.com/
